Kolhapur : मानाचा प्रथम गणपती! जिवंत वाघ अन् अस्वल आणण्यापासून ते समाजप्रबोधन, 150 वर्षांची अनोखी परंपरा, VIDEO

लोकमान्य टिळक यांनी ज्या उद्देशाने सार्वजनिक गणेशोत्सव साजरा करण्याची मुहूर्तमेढ रोवली, तो उद्देश डोळ्यांसमोर ठेवून कार्यरत असण्याचा आपल्या मंडळाचा मानस आहे. थोडक्यात समाजप्रबोधन हे या मंडळाचे मुख्य उद्दिष्ट आहे. भागातल्या युवकांना र्मदानी खेळ व कुस्तीची आवड निर्माण व्हावी म्हणून तुकाराम विठू माळी यांनी जागा दिली. म्हणून ही तालीम पुढे 'तुकाराम माळी तालीम मंडळ' म्हणून 1875 साली उदयाला आली. 1970 सालापासून गणेश विसर्जन मिरवणुकीची सुरुवात या तालीम मंडळाच्या गणेशपूजनाने होते. त्या वेळेपासून आजतागायत 'प्रथम मानाचा गणपती' म्हणून या मंडळान अबाधित ठेवले आहे.

मंडळाच्या शेकडो महिला कार्यकर्त्या एकसारखी वेशभूषा परिधान करून झिम्मा-फुगडी खेळत मिरवणुकीत सहभागी होतात. पुरुष कार्यकर्तेही पांढरा पोशाख, भगवी टोपी अथवा फेटे घालून सहभागी होतात. तालमीची मिरवणूक कायम शहरवासियांच्या उत्सुकतेचा विषय ठरते. आतापर्यंत मंडळाने ढोल, ताशा, झांजपथक, पोलिस बँड, धनगरी ढोल या पारंपरिक वाद्यांत मिरवणूक काढली आहे. शिस्तबद्ध मिरवणूक व प्रबोधनात्मक देखावे सादर करुन मंडळाने अनेक बक्षिसे पटकावली आहेत. मंडळाने यंदा रस्त्यावर मंडप न घालता तालमीच्या आतील पॅसेजमध्ये भव्य मंडप घालून आकर्षक सजावट करण्याचा निर्णय घेतला आहे. यंदा रिकाम्या पदपथावर समाजप्रबोधन, ऐतिहासिक, चालू घडामोडी या विषयांवर वेगळ्या पद्धतीने सादरीकरण केले जाणार आहे.