Shiv Misal Kolhapur : वडिलोपार्जित कोल्हापुरी चप्पलचा व्यवसाय सोडला, दोन्ही भावांनी फेमस केली मिसळ, दिवसाला 400 प्लेटची विक्री

कोल्हापूर : कोल्हापुरी चप्पल ही जगप्रसिद्ध आहे. कित्येकजण वर्षानुवर्षे कोल्हापुरी चपलाचा व्यवसाय करत आले आहेत. मात्र, आपला वडिलोपार्जित कोल्हापुरी चपलाचा व्यवसाय सोडून दुसऱ्या क्षेत्रात आपल्या नाव कमावण्याचा प्रयत्न कोल्हापुरातील दोन भाऊ सध्या करत आहेत. कोल्हापूरची विशेष ओळख असणाऱ्या मिसळ विक्रीचा व्यवसाय या भावंडांनी उत्तम पद्धतीने चालवला आहे. कोल्हापूर शहरातील ऐतिहासिक दसरा चौकात शिव मिसळ या नावाने मिळणारी त्यांची मिसळ खाद्यप्रेमींची विशेष पसंती बनून गेली आहे. आज जाणून घेऊयात, त्यांच्या जिद्दीची ही प्रेरणादायी कहाणी.

कोल्हापुरात पुरुषोत्तम कारंडे हे गेली 30 ते 40 वर्षे कोल्हापुरी चप्पलचा व्यवसाय करून त्यावर उदरनिर्वाह करत होते. कोल्हापूरच्या लक्ष्मीपुरी परिसरात त्यांचे चप्पलचे छोटेसे दुकान होते. मात्र, वडिलांच्या निधनानंतर आणि अतिक्रमणाच्या कारणास्तव कारंडे यांचे चप्पलचे दुकान बंद करावे लागले. त्यावेळी पुरुषोत्तम यांची मुले संजय आणि प्रशांत हे दोघेही क्षण घेतच बाहेर नोकरीही करत होते. मात्र, स्वतःचा एक व्यवसाय असावाच, या उद्देशाने मित्रांच्या साहाय्याने 2009 मध्ये संजय आणि प्रशांत या दोघा भावांना मिळून शिव मिसळ नावाने कोल्हापुरी मिसळचा व्यवसाय सुरू केला होता. तेव्हापासून आजतागायत दोघांनी मिळून आपल्याकडील मिसळला कोल्हापुरातील एक प्रसिद्ध मिसळ बनवले आहे.