जिवंत गेला मृत परतला, ज्याची भीती होती तेच घडलं, शेवटचं लोकेशन महाबळेश्वर, साताऱ्यातील तरुण भयावह अवस्थेत

मिळालेल्या माहितीनुसार, भगवतसिंह मदनसिंह सोळंकी (वय १८, रा. ढेबेवाडी, ता. पाटण) अस मृत मुलाचं नाव आहे. सोळंकी कुटुंब हे मूळचे राजस्थानचे असून गेल्या २० वर्षांपासून ते पाटण तालुक्यातील ढेबेवाडी येथे स्थायिक झाले आहे. त्यांचा बाजारपेठेत बेकरी आणि स्वीट्सचा व्यवसाय आहे. भगवतसिंह हा महाविद्यालयीन शिक्षण घेत होता. मात्र, उच्च शिक्षणासाठी आवश्यक असलेल्या सीईटी परीक्षेचा फॉर्म त्याने भरला नव्हता. याच कारणावरून तो गेल्या काही दिवसांपासून मानसिक तणावाखाली होता, असे समजते.

भगवतसिंह हा शुक्रवार, २३ जानेवारी रोजी घरातून कोणालाही काहीही न सांगता निघून गेला होता. तो बराच वेळ घरी न परतल्याने कुटुंबीयांनी त्याची शोधाशोध सुरू केली. मात्र, त्याचा कोणताही थांगपत्ता न लागल्याने अखेर ढेबेवाडी पोलीस ठाण्यात तो बेपत्ता असल्याची तक्रार नोंदवण्यात आली. यानंतर सातारा जिल्ह्यातील सर्व पोलीस ठाण्यांना 'मिसिंग'चा मेसेज पाठवण्यात आला होता.

तपासादरम्यान भगवतसिंहच्या मोबाईलचे लोकेशन महाबळेश्वरच्या केट्स पॉईंट परिसरात असल्याचे पोलिसांना आढळले. ही माहिती मिळताच पाचगणी पोलिसांनी तातडीने हालचाली करत सह्याद्री ट्रेकर्स, प्रतापगड सर्च अँड रेस्क्यू टीम आणि महाबळेश्वर ट्रेकर्सच्या मदतीने शोधमोहीम राबवली. ट्रेकर्सनी ४०० फूट खोल दरीत उतरून शोध घेतला असता, त्यांना भगवतसिंहचा मृतदेह आढळून आला. ट्रेकर्सच्या मदतीने मृतदेह दरीतून बाहेर काढून शवविच्छेदनासाठी शासकीय रुग्णालयात पाठवण्यात आला. एका साध्या परीक्षेच्या फॉर्ममुळे मुलाने इतका टोकाचा निर्णय घेतल्याने परिसरात हळहळ व्यक्त होत आहे. या घटनेचा अधिक तपास ढेबेवाडी पोलीस करत आहेत.