दिवसाला 10 तास काम! खासगी क्षेत्रातील कर्मचाऱ्यांचे कामाचे तास वाढवण्याची महाराष्ट्र सरकारची तयारी? जाणून घ्या संपूर्ण माहिती

राज्याचे कामगारमंत्री आकाश फुंडकर यांनी पीटीआयला दिलेल्या माहितीनुसार, सरकार दैनंदिन कामाचे कमाल तास नऊवरून दहा करण्याचा विचार करत आहे. हा प्रस्ताव नुकताच मुंबईत झालेल्या मंत्रिमंडळ बैठकीत कामगार विभागाने सादर केला असून त्यावर अद्याप अंतिम निर्णय घेतलेला नाही.

हा प्रस्ताव अमलात आणण्यासाठी महाराष्ट्र दुकाने आणि आस्थापना (रोजगार नियमन आणि सेवा अटी) अधिनियम, 2017 मध्ये सुधारणा करावी लागणार आहे. सध्या हा कायदा राज्यातील दुकाने, हॉटेल्स, मनोरंजन केंद्रे आणि विविध खासगी व्यवसायांसाठी कामाचे तास आणि सेवा अटी ठरवतो. सरकारच्या मते, या सुधारणा आंतरराष्ट्रीय कामगार नियमांच्या अनुरूप असतील आणि कार्यस्थळांना अधिक लवचिकता देतील.

ओव्हरटाइम तास वाढणार: सध्या तीन महिन्यांत 125 तास ओव्हरटाइमची मर्यादा आहे, ती वाढवून 144 तास करण्याचा विचार आहे.