सालगड्याचं अपहरण करून अंग निळं होईपर्यंत मारहाण, तोंडावर केली लघुशंका; पोलीस फौजदारालाही मारलं, बीडमधील घटना

राजाराम दाजीबा सिरसाट हे त्यांच्याकडे सालगडी आहे, तर नात जावई विश्वनाथ पंडीत आहेत. ते दारू पिण्याच्या आहारी गेले. दोघेही ऊसतोड मजूर असून मंजरथ (ता.पाथरी) येथील एका मुकादमाकडून १२०० रूपये घेतले होते. विश्वनाथने मुकादमाकडून घेतलेले पैसे  परत न दिल्याने वाद झाला होता. त्यातून मुकादमाच्या माणसाने त्यांचं अपहरण करून लवूळ येथील स्मशानभूमीत नेलं. तिथे विश्वनाथने राजाराम यांना संपर्क करून बोलावून घेतलं. यावेळी मुकादमाने १२०० रूपयांच्या बदल्यात दीड लाख रूपयांची मागणी केली. हे पैसे घेऊन गेल्यानंतर त्यांनी विश्वनाथला सोडून राजाराम यांना पकडलं. यावेळी मुकादमाच्या माणसांनी शिरसाट यांना बेदम मारहाण केली. त्यानंतर दुचाकीवरून ढोरगाव शिवारात नेलं. तिथे कत्ती, लोखंडी रॉड, काठ्या आदींनी बेदम मारहाण केली. त्यानंतर त्यांनी पाणी मागितलं तर त्यांच्या तोंडावर लघुशंका केली, असा आरोप पीडितने केला आहे. दोन तास मारहाण केल्यानंतर मुलाने येऊन सुटका केली. शिरसाट यांच्यावर जिल्हा रुग्णालयात उपचार सुरू आहे. या प्रकरणी माजलगाव पोलीस ठाण्यात गुन्हा दाखल करण्यात आला आहे. या प्रकरणाचा अधिक तपास पोलीस करत आहे.