LPG Crisis: ''LPG सिलिंडर हवं असेल तर मला सांगा'', जैन समुदायासाठी आवाहन! पत्रावरून मंत्री लोढा पुन्हा वादात

मुंबई: अमेरिका आणि इस्रायलने इराणवर केलेल्या हल्ल्यानं आखातामध्ये सध्या युद्ध पेटलं आहे. जवळपास २९ दिवसानंतरही युद्धाची धग कमी झाली नाही. या युद्धाचा परिणाम भारतातील स्वयंपाकघरावरही झाला आहे. भारतात एलपीजी सिलिंडरसाठी ग्राहकांच्या रांगा लागल्या आहेत. देशाची आर्थिक राजधानी असलेल्या मुंबईतही एलपीजी मिळत नसल्याचे म्हटले जात आहे. अशातच राज्याचे मंत्री मंगलप्रभात लोढा यांच्या एका पत्रामुळे नवा वाद निर्माण होण्याची शक्यता आहे. जैन समुदायाला गॅस सिलिंडरची आवश्यकता असल्यास तातडीने कळवावे, अशा आशयाचे त्यांचे पत्र समोर आले आहे. त्यामुळे देशातील सगळे नागरिक त्रस्त असताना एका विशिष्ट समुदायाला मंत्री लोढा झुकतं माप देत असल्याचे चर्चांना उधाण आले आहे.