उपोषण सोडताच मनोज जरांगे पाटील यांना अश्रू अनावर, धायमोकलून रडले, विखे पाटलांनी समजावलं

मुंबई : मनोज जरांगे पाटील यांच्या आठपैकी सहा मागण्या मंजूर झाल्यानंतर आणि शासनाने तसा अध्यादेश जाहीर केल्यानंतर त्यांना मंचावरच अश्रू अनावर झाले. हा लढा सोपा नव्हता, पण मराठा समाजाच्या पाठिंब्यावर आपल्याला ऐतिहासिक लढा जिंकता आला. आधीच २ कोटी मराठ्यांना आपण आरक्षण मिळवून दिले आहे, आता सातारा गॅझेटच्या अनुषंगाने पश्चिम महाराष्ट्रातील मराठेही आरक्षणातील जातील. महाराष्ट्राला मी कधीही विभागानुसार पाहत नाही. खान्देश, मराठवाडा, कोकण, पश्चिम महाराष्ट्र आणि विदर्भाला मी आपले मानतो. त्यामुळेच समाज मागे पाठीशी राहिला, असे म्हणत जरांगे पाटील यांच्या डोळ्यात आनंदाश्रू आले. मंत्री विखे पाटील यांनी जरांगे पाटील यांनी समाजासाठी दिलेल्या लढ्याचे कौतुक करून त्यांच्या पाठीवर शाबासकीची थाप दिली.