'शिवीगाळ करणे गुन्हा ठरत नाही', मुंबई उच्च न्यायालयाचा मोठा निर्णय

मिळालेल्या माहितीनुसार, हे प्रकरण वकील प्रवीण जाडे यांच्याशी संबंधित आहे. त्यांच्यावर मागील वर्षी परतवाडा पोलीस ठाण्यात एक गुन्हा दाखल करण्यात आला होता. गुन्ह्यात कलम २९४ (अश्लील शब्दांचा वापर) आणि ५०६ (गुन्हेगारी धमकी) अशी कलमं लावण्यात आली होती. याचा विरोध करत जाडे यांनी न्यायालयात दाद मागितली होती. त्यानंतर न्यायालयाने त्यांच्यावरील गुन्हा रद्द करत शिवीगाळ करणं गुन्हा नसल्याचं म्हटलं आहे.

तक्रारीनुसार, १२ फेब्रुवारी २०२४ रोजी एक शिक्षिका आणि त्यांचे वडील भरणपोषणाशी संबंधित खटल्यात न्यायालयात उपस्थित होते. त्या वेळी शिक्षिकेच्या पतीचे वकील प्रवीण जाडे यांनी दोघांना धमकावून अशोभनीय भाषा वापरल्याचा आरोप करण्यात आला होता. या घटनेमुळे घाबरलेल्या शिक्षिकेने काही दिवसांनी पोलिसात तक्रार दिली.

प्रवीण जाडे यांनी उच्च न्यायालयात याचिका दाखल करून म्हटले की, त्यांच्या विरोधातील आरोप खोटे असून त्यात कोणताही गुन्हेगारी हेतू नाही. कलम २९४ तेव्हाच लागू होते जेव्हा सार्वजनिक ठिकाणी अश्लील कृती किंवा गाण्यांमुळे इतरांना त्रास होतो; मात्र या प्रकरणात फक्त अपशब्द वापरण्याचा आरोप आहे. न्यायालयाने नमूद केले की, या प्रकरणात ना कलम २९४, ना कलम ५०६ अंतर्गत कोणताही गुन्हा सिद्ध होत नाही. त्यामुळे न्यायालयाने जाडे यांची याचिका मंजूर करून गुन्हा आणि त्यासंबंधित न्यायालयीन कार्यवाही रद्द करण्याचा आदेश दिला.