Malegaon Girl Murder: 'ती' आता कुठे चालायला लागली, नराधम विजयने अत्याचार करून चेहरा दगडाने ठेचला, हे सैतानी कृत्य का केलं?

डोंगराळे गावात ही घटना ३ दिवसांपूर्वी घडली होती.  विजय संजय खैरनार या नराधमाने ३ वर्षांच्या लेकीवर अत्याचार केले आणि  बिंग फुटू नये म्हणून नंतर अक्षरश: दगडाने ठेचून त्या चिमुकलीची हत्या करून टाकली.. त्यानंतर तिचा मृतदेह हा गावातच निर्जनस्थळी फेकून दिला होता. मुलगी बेपत्ता झाल्यामुळे सगळ्यांनी शोध घेतला. तेव्हा एका ठिकाणी ही चिमुरडी जखमी अवस्थेत आढळली होती. चिमुरडीला रुग्णालयात नेलं असता तिचा मृत्यू झाल्याचं डॉक्टरांनी सांगितलं. या घटनेमुळे अवघं गाव सुन्न झालं.  मृत चिमुरडीच्या वडिलांसोबत आरोपी विजय खैरनार याचे काही महिन्यांपूर्वी भांडण झालं होतं. या भांडणाचा बदला घेण्यासाठी विकृत विजयने हे कृत्य केल्याची गावात चर्चा आहे. पोलिसांनी विजयाला अवघ्या काही तासांमध्ये अटक केली.

या घटनेमुळे गावात संतापाची लाट उसळली.नराधम विजय खैरनारला कडक शिक्षा झाली पाहिजे, यासाठी  गावात कडकडीत बंदही पाळण्यात आला. या घटनेचे पडसाद दुसऱ्या दिवशी म्हणजेच सोमवारी ही उमटले. आरोपीला फाशीची शिक्षा त्वरित द्यावी, या मागणी साठी संतप्त ग्रामस्थांनी आक्रमक भूमिका घेत मालेगावला टायर जाळत सुमारे चार तास रास्ता रोको केला. याची माहिती मिळताच मंत्री दादा भुसे  आंदोलनस्थळी पोहोचले. त्यांनी नातेवाईक आणि ग्रामस्थांची चर्चा केली यावेळी त्यांच्या सोबत जिल्हा पोलीस अधीक्षक बाळासाहेब पाटील हे होते.

तर मंगळवारी मंत्री दादा भुसे यांच्या सोबत डोंगराळे च्या ग्रामस्थांनी मुख्यमंत्री देवेंद्र फडणवीस, उपमुख्यमंत्री एकनाथ शिंदे यांची भेट घेत सदर प्रकरण हा फास्टट्रॅक कोर्टात चालवून ऍड. उज्वल निकम यांची नियुक्ती करण्याची मागणी केली.