Ajit Pawar : शरद पवारांचे निवृत्तीचे संकेत, अजितदादा म्हणतात, मी याबद्दल खूप मोठी किंमत मोजलीय

मी १४ निवडणुका लढलो आणि त्यात विजयी झालो. अजून दीड वर्षे मी राज्यसभेचा खासदार असणार आहे. मुदत संपली की पुन्हा राज्यसभेवर जायचं की नाही याचा विचार करावा लागेल. मी लोकसभा लढणार नाही. आता किती निवडणुका लढवायच्या. त्यामुळे आता थांबले पाहिजे असं शरद पवार मंगळवारी बारामतीत बोलताना म्हणाले.

दीड वर्षापूर्वी शरद पवार यांनी लोक माझे सांगाती या आत्मचरित्राच्या दुसऱ्या भागाच्या प्रकाशनावेळी निवृत्तीची घोषणा केली होती. पक्षाच्या अध्यक्षपदावरून निवृत्त होणार असल्याचं ते म्हणाले होते. त्यावेळी कार्यकर्त्यांनी गोंधळ घालत शरद पवार यांनी त्यांचा निर्णय मागे घ्यावा अशी मागणी केली होती. तेव्हा अजित पवार यांनी शरद पवार यांच्या निवृत्तीचा निर्णय योग्य असल्याची भूमिका घेतली होती. त्यावरून त्यांच्यावर टीकाही झाली. त्यानंतरच राष्ट्रवादी काँग्रेसमध्ये फूट पडली आणि अजित पवार हे महायुतीत सहभागी झाले.