पिंपरी चिंचवड महानगरपालिकेत BJP-NCP एकत्र सत्तेत बसणार? शीतल शिंदे नाराज होऊन महापालिकेतून निघून गेले

पिंपरी चिंचवड महापालिका निवडणुकीत भारतीय जनता पक्ष आणि अजित पवार यांची राष्ट्रवादी काँग्रेस यांच्यात कमालीचा संघर्ष झाला. दिवंगत नेते अजित पवार आणि भाजप आमदार महेश लांडगे यांच्यातील वाकयुद्ध राज्यात गाजले. अखेर या लढाईत महेश लांडगे यांची सरशी झाली. आता अजित पवार यांच्या माघारी दोन्ही पक्षात संघर्ष नको असे मानून महापालिकेत सत्तेत एकत्र बसण्याच्या हालचाली सुरू असल्याचे कळते.

सलग तीन वेळा नगरसेवक म्हणून निवडून आलेले भाजपचे निष्ठावंत शीतल शिंदे हे महापौरपद मिळावे, यासाठी आग्रही होते. परंतु त्यांचे नाव उपमहापौर पदासाठी पुढे आल्याने ते पक्षावर नाराज झाले. महापौर पदावर रवी लांडगे यांची वर्णी लागल्याने शीतल शिंदे नाराज होऊन महापालिकेतून निघून गेले. उपमहापौर पदासाठी शितल शिंदे यांची मनधरणी केली जात होती. परंतु मला उपमहापौरपद नको असे म्हणत त्यांनी पक्षावर आपली नाराजी व्यक्त केली.

पिंपरी-चिंचवड महापौरपदाची निवडणूक सोमवारी संपन्न झाली. या निवडणुकीत राष्ट्रवादी काँग्रेस पक्षाने अर्ज भरला नाही. उपमुख्यमंत्री अजित पवार यांच्या अपघाती निधनामुळे राष्ट्रवादी काँग्रेसने महापौर पदाची निवडणूक न लढवण्याचा निर्णय घेतला होता. अजित पवारांनी पिंपरी चिंचवड महापालिका निवडणुकीत भाजपला मोठे आव्हान दिले होते, मात्र त्यांच्या निधनानंतर पक्षाने आदरांजली म्हणून उमेदवार न देण्याचे ठरवले. राष्ट्रवादी काँग्रेसने निवडणूक न लढविल्याने भाजपचा उमेदवार बिनविरोध निवडून आला.