Trending:

तुरुंगातून निवडणूक लढवणाऱ्या बॉसला दणका, भाजपने मैदान मारलं, नाशिकमध्ये उलटफेर

Published by:Ajit Bhabad

Last Updated:Jan 16, 2026 4:43 PM IST

Nashik Election 2026 : नाशिक महानगरपालिकेचा निकाल आज (दि. १६ जानेवारी) जाहीर झाला असून, यामध्ये प्रभाग क्रमांक ११ संपूर्ण शहरात चर्चेचा केंद्रबिंदू ठरला आहे.

इम्पॅक्ट शॉटतुमचा गेटवे लेटेस्ट न्यूज

नाशिक : नाशिक महानगरपालिकेचा निकाल आज (दि. १६ जानेवारी) जाहीर झाला असून प्रकाश लोंढे उर्फ ‘बॉस' याचा पराभव झाला आहे. भाजपचा उमेदवार विजयी झाला आहे. यामध्ये प्रभाग क्रमांक ११ संपूर्ण शहरात चर्चेचा केंद्रबिंदू ठरला आहे. या प्रभागातून नाशिकरोड कारागृहात बंद असलेला माजी नगरसेवक आणि संशयित आरोपी प्रकाश लोंढे उर्फ ‘बॉस’ याने निवडणूक लढविल्याने मोठी खळबळ उडाली होती. गोळीबार, खंडणीसह गंभीर स्वरूपाच्या गुन्ह्यांमध्ये तसेच ‘मोक्का’ अंतर्गत कारवाई झाल्यामुळे लोंढे सध्या न्यायालयीन कोठडीत आहे.

दोन तासांसाठी ‘बालेकिल्ल्यात’ उपस्थिती

सुमारे तीन महिन्यांनंतर प्रकाश लोंढे सातपूर येथील आपल्या परिसरात अवघ्या दोन तासांसाठी परतल्याने परिसरात मोठी गर्दी झाली होती. काकू भिकूबाई लोंढे यांच्या निधनामुळे अंत्यविधीसाठी न्यायालयीन परवानगी घेऊन मंगळवारी रात्री पोलिसांच्या कडेकोट बंदोबस्तात लोंढेला सातपूरमध्ये आणण्यात आले होते. अंत्यसंस्कारानंतर काही काळ तो आपल्या समर्थकांमध्ये दिसल्याने वातावरण तणावपूर्ण झाले होते.

गंभीर गुन्ह्यांमुळे चर्चेत असलेले नाव

नाशिक पोलिस आयुक्तालयाच्या ‘कायद्याचा बालेकिल्ला’ या मोहिमेतील प्रमुख कारवाईत प्रकाश लोंढे आणि त्याच्या टोळीला सर्वप्रथम अटक करण्यात आली होती. ५ ऑक्टोबर २०२५ रोजी आयटीआय सिग्नल परिसरातील बारबाहेर झालेल्या गोळीबार प्रकरणासह विविध गंभीर गुन्ह्यांमध्ये लोंढे, त्याचे दोन्ही मुले आणि टोळीतील सदस्य सध्या कारागृहात आहेत. या पार्श्वभूमीवरही लोंढेने महापालिका निवडणूक लढविल्याने राजकीय वर्तुळात तीव्र चर्चा सुरू झाली होती.

न्यायालयीन परवानगीने निवडणूक रिंगणात

न्यायालयीन परवानगीने प्रकाश लोंढेने नाशिक महापालिकेच्या निवडणुकीसाठी उमेदवारी अर्ज दाखल केला होता. रिपब्लिकन पार्टी ऑफ इंडिया (आठवले गट) कडून तो अधिकृत उमेदवार म्हणून निवडणूक रिंगणात होता. दरम्यान, काकूंच्या निधनामुळे त्याला अंत्यसंस्कारासाठी तात्पुरती परवानगी देण्यात आली होती. त्यानुसार रात्री साडेनऊच्या सुमारास तो पोलिसांच्या सुरक्षाकवचात सातपूर अमरधाम येथे पोहोचला.

‘संयम पाळा, आपल्याला लढायचंय’ लोंढेनी केलं होतं आवाहन

लोंढे सातपूरमध्ये येणार असल्याची माहिती मिळताच स्थानिक पोलिस, गुन्हे शाखा आणि दंगल नियंत्रण पथक तैनात करण्यात आले होते. पोलिसांच्या वाहनाभोवती समर्थकांनी गर्दी केल्याने काही काळ तणाव निर्माण झाला होता. अंत्यसंस्कारानंतर भावनिक होत लोंढेने उपस्थितांना उद्देशून, “संयम ठेवा, नियम पाळा. हात जोडून विनंती करतो, शांतता राखा. माझ्या कुटुंबाला सांगतो, आता रडू नका. कारण आपल्याला लढायचंय,” असे आवाहन केले होते.

या संपूर्ण घटनेमुळे प्रभाग क्रमांक ११ मधील निवडणूक निकालाबरोबरच प्रकाश लोंढेची भूमिका आणि त्याचा राजकीय प्रभाव पुन्हा एकदा चर्चेच्या केंद्रस्थानी आला आहे.