Pune: माजी जि. प. अध्यक्षाच्या वाढदिवसाला DJ बोलवला, अचानक ब्रेक फेल, पाच जणांना चिरडलं, एकाचा मृत्यू

जुन्नर तालुक्यातील आदिवासी नेते आणि पुणे जिल्हा परिषदेचे माजी अध्यक्ष देवराम लांडे यांच्या वाढदिवसानिमित्त जुन्नर शहरात मिरवणुकीचे आयोजन करण्यात आले होते. या मिरवणुकीला ढोल ताशा पथकासह डीजेही लावण्यात आला होता. मिरवणूक सुरू झाल्यानंतर काही वेळातच डीजेच्या गाडीचे ब्रेक फेल झाल्याने चालकाचे गाडीवरील नियंत्रण सुटले व गाडीने जवळच असणाऱ्या ढोल ताशा पथकातील चार ते पाच तरुणांना चिरडले. त्यानंतर ही गाडी एका इमारतीच्या संरक्षक भिंतीला जाऊन धडकली.

गाडीने चिरडलेल्या तरुणांना तत्काळ उपचारासाठी नेण्यात आले. मात्र या दुर्दैवी घटनेत आदित्य सुरेश काळे (वय २१) या तरुणाचा उपचारादरम्यान मृत्यू झाला असून इतरांची प्रकृती गंभीर आहे. जखमींवर जुन्नर मधील खाजगी रुग्णालयात उपचार सुरू आहेत.