गुरुकुलातला महाराज झाला राक्षस, विद्यार्थिनीला मिठी मारून नको तिथे स्पर्श; साधनेच्या नावाखाली विकृती

रत्नागिरी : खेडमधील लोटे येथील आध्यात्मिक वारकरी गुरुकुलमध्ये गुरुकुलच्या प्रमुखानं आणि शिक्षकाने एका अल्पवयीन मुलीचा विनयभंग केल्याचं समोर आलंय. मुलीनं तक्रार दिल्यानंतर या दोघांवरही गुन्हा दाखल करण्यात आला होता.. दरम्यान याप्रकरणी गुरुकुलाचे प्रमुख भगवान कोकरे महाराज यांना अटक करण्यात आली आहे. तर कोकरे महाराज आणि शिक्षकाला फाशी द्या, अशी मागणी पीडित मुलीने केली आहे.

लोटे येथील आध्यात्मिक वारकरी गुरुकुलात घडलेल्या अल्पवयीन मुलीवरील विनयभंग प्रकरणाने खेड तालुका हादरला आहे. या प्रकरणात गुरुकुलाचे प्रमुख भगवान कोकरे महाराज आणि शिक्षक प्रीतेश कदम यांच्याविरोधात खेड पोलिस ठाण्यात गुन्हा दाखल झाला आहे.पीडितेने न्यूज 18 लोकमतशी बोलताना संताप व्यक्त केला आहे. माझं आयुष्य उद्ध्वस्त झालंय, अशा नराधमांना फाशीची शिक्षा झालीच पाहिजे अशी मागणी पीडित तरुणीने केली आहे.

या प्रकरणामुळे जिल्हाभरात तीव्र संतापाची लाट उसळली असून, समाजातूनही या आरोपींवर कठोरातील कठोर कारवाई आणि फाशीची शिक्षा व्हावी, अशी मागणी होत आहे. वारकरी परंपरेचा मुखवटा लावून चाललेल्या या अधर्मावर आता न्याय मिळेपर्यंत लढा सुरूच राहणार आहे, असा निर्धारही पिडीतेच्या परिवाराने व्यक्त केला आहे.

पीडित मुलीने घडलेला प्रकार सांगताना म्हणाली, गुरुकुलमधील पहिले आठ दिवस चांगले गेले. त्यानंतर महाराज खोलीमध्ये एकटी असताना येत असे. त्यांनी मिठी मारली नको तिथे स्पर्श केला. हा प्रकार नेहमीच घडत होता मात्र मी भीतीपोटी कोणालाच सांगत नव्हते. एवढच नाही तर घडलेला प्रकार कोणाला सांगायचा नाही अशी धमकी देखील दिली होती. भावाला संपवण्याची धमकी दिली होती.

गुरुकुलातील अल्पवयीन मुलीच्या विनयभंग प्रकरणात आरोपी असलेले गुरुकुलाचे प्रमुख भगवान कोकरे महाराज आणि शिक्षक प्रितेश कदम यांना खेड पोलिसांनी आज न्यायालयात हजर केले. न्यायालयाने दोन्ही आरोपींना दोन दिवसांची पोलीस कोठडी सुनावली आहे.

न्यायालयीन कारवाईदरम्यान अचानक भगवान कोकरे महाराज यांना फिट आली, त्यानंतर घटनास्थळीच परिस्थिती गोंधळाची झाली. पोलिसांनी तात्काळ रुग्णवाहिका बोलावून त्यांना कळंबनी उपजिल्हा रुग्णालयात उपचारासाठी हलवले.या घटनेमुळे न्यायालय परिसरात मोठी गर्दी झाली होती. संबंधित प्रकरणाबाबत पोलिसांकडून पुढील तपास सुरू आहे.