व्यवस्थेच्या छाताडावर पाय रोवून मी इथपर्यंत आले, गरज पडली तर ख्वाडा... रुपाली पाटील यांचा इशारा कुणाला?

महिला आयोगाच्या अध्यक्षा रुपाली चाकणकर यांच्याशी गेल्या काही काळापासून रुपाली पाटील यांचा संघर्ष सुरू आहे. फलटण डॉक्टर आत्महत्या प्रकरणात रुपाली चाकणकर यांनी महिलेची बदनामी केल्याचा आरोप करून रुपाली पाटील ठोंबरे यांनी पुन्हा एकदा संघर्ष छेडला. अगदी त्यांना चाबकाने फोडून काढण्याची भाषा वापरली. त्याची दखल पक्षाने लगोलग घेऊन कारवाई केली. मात्र पक्षाकडून झालेल्या कारवाईनंतर रुपाली पाटील दुखावल्या गेल्या आहेत. त्यांनी फेसबुक पोस्ट करून आपली नाराजी व्यक्त केली आहे.

शेतकरी कन्या डॉ. संपदा मुंडे यांना न्याय न देता त्यांच्या चारित्र्यावर आघात करण्यात आला. या अन्यायाविरुद्ध आपण आवाज उठवणार असल्याचे सांगत माझा आवाज दाबला जाईल? असा सवाल करून प्रस्थापित व्यवस्थेच्या छाताडावर पाय रोवून मी इथपर्यंत पोहोचले आहे. आमचा इतिहास अन्याय सहन करणाऱ्यांचा नाही, असे पक्ष नेतृत्वाला त्यांनी ठणकावून सांगितले आहे. गरज पडली तर ख्वाडा करेन, असा निर्वाणीचा इशाराही त्यांनी दिला आहे.

प्रयोगशील दिग्दर्शक भाऊराव कऱ्हाडे यांच्या ख्वाडा चित्रपटाचा एक प्रसंग फेसबुकवर शेअर करून व्यवस्थेच्या विरोधात लढाई करण्यास सज्ज असल्याचेच अप्रत्यक्षपणे रुपाली पाटील यांनी सांगितले.

स्थानिक स्वराज्य संस्थेच्या निवडणुकांआधी पक्षातील महिला नेत्यांमध्ये सुरू असलेल्या संघर्षाच्या कारणातून पक्षाची प्रतिमा मिलन होत असल्याने रुपाली पाटील यांची प्रवक्ते पदावरून हकालपट्टी करण्याचा निर्णय अजित पवार यांनी घेतला. रुपाली पाटील यांच्यासोबत आमदार अमोल मिटकरी यांनाही पक्षाने प्रवक्तेपदावरून बाजूला केले. पक्षातील दोन धडाडीच्या प्रवक्त्यांना बाजूला सारून निवडणुकीच्या आधी प्रतिमा उंचाविण्याचा प्रयत्न असल्याचे सूत्रांनी सांगितले. दरम्यान पक्षाच्या निर्णयावर दोन्ही नेते नाराज असल्याचे कळते. परंतु तरीही निवडणुकांना ताकदीने सामोरे जाण्याचा मानस त्यांनी व्यक्त केला.