Santosh Deshmukh Murder: सरपंच संतोष देशमुख हत्या प्रकरणात कोर्टातून मोठी अपडेट, पसार कृष्णा आंधळे...

बीड न्यायालयात आज संतोष देशमुख हत्या प्रकरणाची सुनावणी पार पडली. यावेळी धनंजय देशमुख यांनी माध्यमांशी संवाद साधला यात तपासातील विलंब, फरार आरोपी आणि राजकीय दबावाबाबत गंभीर आरोप केले. न्यायालयाने फरार आरोपीबाबत माहिती देण्याचे निर्देश दिल्याचे सांगत त्यांनी तपास अधिकाऱ्यांना लवकरात-लवकर कारवाई करण्याची मागणी केली आहे. 12 डिसेंबरला चार्ज फ्रेमची तारीख असून एक वर्षानंतरही एक आरोपी फरार असणं हे दुर्दैव असा आरोप धनंजय देशमुखांनी केला. 29 नोव्हेंबरला प्रथम पुण्यस्मरण असून सर्वांनी उपस्थित राहण्याचे आवाहनही त्यांनी केले.

देशमुख कुटुंबावर सुरुवातीपासूनच शासकीय अधिकारी, राजकीय व्यक्तींनी आरोपींना मदत केली, दबाव टाकला, तसेच त्यांना विविध प्रकरणांत गोवण्याचाही प्रयत्न झाला. त्यांनी पुन्हा एकदा स्पष्ट केले की , आम्हाला फक्त न्यायच हवा, आरोपींना फाशीची शिक्षा हीच आमची मागणी आहे.

न्यायालयाने फरार असलेल्या आरोपीबाबतची माहिती देण्याचे निर्देश दिले आहे. आमची तपास यंत्रणेला विनंती आहे लवकरात-लवकर त्याला जेरबंद करावं. पुढच्या 12 तारखेला चार्ज फ्रेमसाठी तारीख आहे. एक वर्षानंतर चार्ज फ्रेम होतोय एक आरोपी फरार आहे हे दुर्दैव आहे. लवकरात लवकर प्रकरण संपावं यासाठी मार्गदर्शक तत्व आहेत त्याचा अवलंब करणं गरजेचं आहे.

लवकरात लवकर निकाल लागावा आणि आरोपींना फाशीची शिक्षा व्हावी हिच आमची मागणी आहे, असे धनजंय देशमुख म्हणाले.

कुठल्या शासकीय अधिकाऱ्यांनी कशा पद्धतीने आरोपींना मदत केली आहे किंवा कुठल्या राजकीय व्यक्तीने दबाव आणला. आम्हाला अनेक प्रकरणात गोवण्याचा प्रयत्न केला पण आमच्या भावाची पुण्याई आहे. अजूनपर्यंत आम्ही कुठेच गुंतलो नाहीत आणि गुंतणारही नाहीत. आम्हाला फक्त न्याय पाहिजे न्यायाव्यतिरिक्त आम्हाला काहीच नाही पाहिजे, असे धनंजय देशमुख म्हणाले