दोन गावच्या महिला आमने-सामने, शिव्यांच्या भडिमारात झाला बोरीचा बार, काय आहे परंपरा?

बोरीचा बार सुरू होताना दोन्ही गावातील महिला एकत्र येऊन ओढ्यावर शिव्यांची लाखोली वाहत असतात. त्यावेळी पुरुष मंडळी ओढ्याच्या मध्यभागी उभे राहून दोन्ही महिलांना एकमेकींपासून लांब ठेवण्याचा प्रयत्न करतात. श्रावणातल्या षष्ठीला हा बोरीचा बार साजरा होत असतो. हा बोरीचा बार होताना हलगी व सनईच्या सुरात महिलांना अधिकच चेव चढतो.

सुखेडच्या पाटलांना दोन पत्नी होत्या. एक सुखेड आणि दुसरी बोरी गावची होती. एक पत्नी सुखेड मध्ये राहत होती आणि दुसरी बोरी या गावी राहत होती. नागपंचमीच्या दुसऱ्या दिवशी या पाटलांच्या पत्नीमध्ये कपडे धुवत असताना सुखेड आणि बोरी यांच्या गावाच्या हद्दीवरून वाहणाऱ्या ओढ्यावर भांडणे सुरू झाली. यावेळी दोघींनी एकमेकांना शिव्यांचा भडीमार केला. यावेळी भांडणादरम्यान या ओढ्याच्या पाण्यामध्ये त्या वाहून गेल्या. तेव्हापासून या बोरीचा बारला सुरुवात झाल्याचे सांगण्यात येते. तेव्हापासून दोन्ही गावच्या महिला वेशीवर येऊन एकमेकींना शिव्या देऊन ही परंपरा पुढे चालू ठेवत असल्याचं गावकऱ्यांनी सांगितलं.