'मिलेट्सचे ताट, आरोग्याचा थाट' स्लोगनची सर्वत्र चर्चा, साताऱ्यातील महिलेची ती कल्पना अन् आज लाखोंची कमाई, VIDEO

सातारा : व्यवसाय सुरू करताना अनेक अडचणी येतात. अनेक अडचणींवर मात करत, जिद्दीने, चिकाटीने आणि स्वतःवर असलेल्या विश्वास ठेऊन काही धाडसी निर्णय घेऊन व्यवसाय सुरू केला जातो. याचे एक उत्तम उदाहरण म्हणजे साताऱ्याच्या उद्योजिका शुभांगी सोनवणे. शुभांगी अंकुश सोनवणे (रा. गोळीबार मैदान) यांनी वैदिक फूड्स या नावाने व्यवसाय सुरू करुन साताऱ्यासह महाराष्ट्रभर आपली वेगळी छाप पाडली आहे. आज जाणून घेऊयात, त्यांचा हा प्रेरणादायी प्रवास.

लॉकडाऊनमध्ये शुभांगी यांच्या पतीची तब्येत अगदी खालावली होती. त्यांच्या शरीरात विटामिन बी12 ची मोठी कमतरता होती. शुभांगी यांचे पती आणि त्यांचे संपूर्ण घर हे शाकाहारी असल्याने या व्हिटामिनची कमतरता कशी भरून काढावी, यासाठी त्यांनी अनेक तज्ञांचे सल्ला घेतला. त्याचबरोबर युट्युबवरही व्हिडिओ पाहिले. त्यानंतर भरड धान्याचा एक व्हिडिओ युट्युबवर पाहिला. यावरुन त्यांना भरड धान्यापासून शरीरातील व्हिटामिन वाढवता येते, असे समजले.

त्यानंतर त्यांनी आपल्या पतीसाठी रायाची बिस्किट, नाचणीची बिस्किट तयार करून त्यांना खाण्यास दिले. त्यातून त्यांची तब्येत सुधारली. जर आपल्या घरातील लोकांना हे खायला दिल्यानंतर याचे अनेक फायदे मिळत आहेत, तर याचाच व्यवसाय केल्यावर अनेकांना विटामिन, न्यूट्रिशन या भरड धान्यापासून मिळेल आणि त्यांच्या अनेक अडचणी दूर होतील, असा विचार त्यांच्या मनात आला.

यानंतर शुभांगी अंकुश सोनवणे यांनी पतीच्या आजारपणासाठी घरी तयार केलेल्या बिस्किटांपासून आपला भरड धान्यांपासूनचा बिस्कीट तयार करण्याचा व्यवसाय सुरू केला. महिन्याला 5 लाख रुपये त्यांना या व्यवसायातून मिळतात. तर हा व्यवसाय त्यांना वर्षाला लाखो रुपये कमवून देत आहे.

या भरड धान्यापासून तयार केलेल्या बिस्किट लहान मुलांपासून ते वयोवृद्ध माणसांपर्यंत करता येत आहे. त्याचबरोबर शुगर बीपी असणाऱ्या नागरिकांनाही या बिस्किटांचा वापर करता येत आहे, असेही वैदिक कुकीज संस्थापिका शुभांगी सोनवणे यांनी सांगितले. त्यांचा हा प्रवास निश्चितच प्रेरणादायी आहे.