नेपाळमध्ये काय झालं, खोलात जात नाही, देवाभाऊ शहाणपणाची भूमिका घेतील, शेतकरी प्रश्नांवरून शरद पवार यांचा आक्रमक

लक्ष्मण घाटोळ, प्रतिनिधी, नाशिक : गेल्या दोन महिन्यात राज्यात दोन हजार शेतकऱ्यांनी आत्महत्या केल्या आहेत. त्यातही मराठवाड्यात शेतकऱ्यांच्या आत्महत्यांचे प्रमाण जास्त आहे. शेतकऱ्यांच्या संकटावर मार्ग काढण्याची जबाबदारी सरकारची आहे. परंतु बळीराजाच्या संकटाप्रश्नी सरकार सपशेल अपयशी ठरले आहे. बळीराजा जर उपाशी ठरला तर देश उद्ध्वस्त होईल, हा छत्रपती शिवाजी महाराजांच्या विचारांचा आदर्श देवाभाऊ घेतील, असे वाटले होते. त्याउलट शिवाजी महाराजांचे नाव घेऊन राज्यात मोठमोठे होर्डिंग्ज लागले आहेत, पोस्टर्स लागले आहेत. परंतु बळीराजाकडे ढुंकून बघायला ते तयार नाहीत, अशी सडकून टीका मूळ राष्ट्रवादीचे अध्यक्ष, ज्येष्ठ नेते शरद पवार यांनी मुख्यमंत्री देवेंद्र फडणवीस यांच्यावर केली. नेपाळमध्ये काय झाले त्याच्या खोलात जात नाही, त्यातून देवाभाऊ शहाणपणाची भूमिका घेईन शेतकरी प्रश्नावर योग्य निर्णय घेतील, असे सूचक वक्तव्य पवार यांनी केले.