एकनाथ शिंदे यांनी ठाकरेंचा विजयी नगराध्यक्षच पळवला, दुसऱ्याच तासाला हातात धनुष्यबाण!

राज्य निवडणूक आयोगाने राज्यातील २८८ नगरपरिषदा आणि नगरपंचायतींच्या सार्वत्रिक निवडणुकांचा कार्यक्रम ४ नोव्हेंबर २०२५ रोजी जाहीर केला. त्यानुसार २ डिसेंबर २०२५ रोजी २६३ नगरपरिषदा आणि नगरपंचायतींसाठी मतदान झाले. उर्वरित ठिकाणी शनिवारी मतदान झाले. सर्व संबंधित ठिकाणी आज २१ डिसेंबरला सकाळी १० वाजल्यापासून मतमोजणीला सुरुवात झाली. दुपारपर्यंत सर्वच नगर परिषदांचा निकाल स्पष्ट झाला असून भाजपने शंभरी ओलांडली आहे. तर एकनाथ शिंदे यांच्या शिवसेनेने अर्धशतक पार केले असून राष्ट्रवादीचेही ४० ठिकाणी नगराध्यक्ष विजयी झाले आहेत. तुलनेत महाविकास आघाडीची कामगिरी विधानसभेसारखीच निष्प्रभ करणारी ठरली. ठाकरे सेनेचे केवळ ८ ठिकाणी नगराध्यक्ष निवडून आले आहेत.

श्रीवर्धन नगर परिषदेच्या नगराध्यक्षपदी अतुल चौगुले हे दणदणीत मतांनी विजयी झाले. मात्र सुनील तटकरे यांच्या उमेदवाराला पराभूत करण्यासाठी शिंदे सेनेचे आमदार भरतशेठ गोगावले यांनी ठाकरेंच्या उमेदवाराला पडद्याआडून मदत केली. दोन्ही शिवसेनेने एकत्र येऊन तटकरे यांच्या उमेदवाराला पराभवाची धूळ चारली.

आमदार भरतशेठ गोगावले, स्थानिक नेते अनिल नवगणे तसेच सेनेचे जिल्हाप्रमुख प्रमोद घोसाळकर यांच्यामुळे माझा विजय झाला. या सगळ्यांनी मला लाखमोलाचे सहकार्य केले. माझा विजय हा शिवसेना ठाकरे गट आणि शिवसेना शिंदे गट यांच्या कार्यकर्त्यांचा आहे. शिवसैनिक हा शिवसैनिक असतो. सगळ्यांनीच माझ्या विजयासाठी अतोनात कष्ट केले. धनशक्ती विरुद्ध जनशक्ती अशी निवडणूक झाली. या निवडणुकीत जनशक्तीच्या पाठिंब्यावर माझा विजय झाला.

वरिष्ठांशी चर्चा करून अंतिम निर्णय घेऊ, आमच्याकडे प्रवेश करण्यासाठी त्याचीही मानसिकता आहे, असे आमदार भरतशेठ गोगावले यांनी सांगितले. याचाच अर्थ चौगुले यांचा पक्षप्रवेश होणार असल्याचेच थेटपणे त्यांनी संकेत दिला.