दसऱ्याला ठाकरेंना कोकणात हादरा; शिंदेंच्या गळाला मोठा मासा, बडा नेता शिवधनुष्य हातात घेणार

सिंधुदुर्ग : स्थानिक स्वराज्य संस्थांच्या निवडणुकीच्या तोंडावर मोठे उलटफेर होताना दिसत होते. काल पर्यंत एका पक्षात असलेले नेते दुसऱ्या दिवशी भलत्याच पक्षात जाताना दिसत आहेत. सध्या पक्ष बदलण्याचा हंगाम सुरू आहे असं म्हटलं तर चुकीचं ठरणार नाही. त्यात आता तळकोकणात एकनाथ शिंदेंनी उद्धव ठाकरेंना जोरदार धक्का देत बडा नेता आपल्याकडे ओढला आहे. त्यामुळे ठाकरेंच्या सेनेचे टेन्शन मात्र वाढले आहे. या नेत्याच्या प्रवेशाने तळकोकणातील राजकीय गणित बदलण्याची दाट शक्यता आहे. सावंतवाडी विधानसभा मतदारसंघातून उद्धव बाळासाहेब ठाकरे यांच्या शिवसेनेतून दिपक केसरकर यांच्या विरोधात लढलेले राजन तेली हे मुंबईतील दसरा मेळाव्यात एकनाथ शिंदे यांच्या उपस्थितीत शिंदे शिवसेनेमध्ये प्रवेश करणार असल्याची माहिती समोर आली आहे.