Solapur Accident: लग्न सोहळ्याहून घरी परतताना नियतीनं घात केला, पतीच्या डोळ्यांदेखत पत्नीचा तडफडून मृत्यू

तांदुळवाडी इथे नातेवाईकांच्या लग्नसमारंभातून घरी परत निघालेल्या दाम्पत्याच्या दुचाकीला एसटी बसने धडक दिल्याने ही भीषण दुर्घटना घडली. या अपघातात पत्नीचा जागीच मृत्यू झाला असून, पती गंभीर जखमी आहे. अपघात इतका भीषण होता की, चंदन काटा, हैद्राबाद रोडवर पाहणाऱ्यांच्या काळजाचा थरकाप उडाला. मृत महिलेचे नाव शाहेनाज महेबुब शेख असे असून, त्यांचे पती महेबुब नबिलाल शेख हे गंभीर जखमी अवस्थेत आहेत.

अपघाताची माहिती मिळताच पोलीस घटनास्थळी दाखल झाले. स्थानिकांच्या मदतीनं त्यांनी जखमी पतीला उपचारासाठी रुग्णालयात दाखल केलं. पत्नीचा जागीच मृत्यू झाल्याने पती महेबुब आणि शेख कुटुंबावर दु:खाचा डोंगर कोसळला आहे. आनंदाच्या क्षणातून परतत असताना नियतीने त्यांच्यावर घात केला. महेबुब आणि शाहेनाज यांचे आयुष्य काही क्षणांपूर्वी आनंद आणि उत्साहाने भरलेले होतं, पण एसटीच्या धडकेने शाहेनाज यांना त्यांच्या पतीपासून कायमचे हिरावून नेलं.

घटनेची माहिती मिळताच खालापूर पोलीस तातडीने घटनास्थळी दाखल झाले. त्यांनी पंचनामा करून जखमी महेबुब शेख यांना तातडीने उपचारासाठी रुग्णालयात दाखल केले आहे. सध्या त्यांच्यावर उपचार सुरू असून, पोलीस पुढील तपास करत आहेत. लग्नाच्या आनंदातून कुटुंबावर अचानक दुःखाचा डोंगर कोसळल्याने सर्वत्र हळहळ व्यक्त होत आहे.