Solapur : सोलापूरात 'टीम हैदराबाद'कडून काँग्रेसचा गेम, 50 जणांच्या जोरावर भेदला प्रणिती शिंदेंचा गड, पाहा कसं?

भाजपची लाट असूनही मतांचे ध्रुवीकरण एमआयएमच्या बाजूने वळवण्यात पक्ष यशस्वी ठरला. 2024 चे सोलापूर शहर मध्यचे एमआयएम पक्षाचे उमेदवार फारूक शाब्दी यांनी पक्षातील अंतर्गत वादातून ऐन निवडणुकीच्या तोंडावर पक्षाचा राजीनामा दिला. यातून एमआयएम पक्षाचे जिल्हाध्यक्ष अशोक पठाण यांच्याकडे सोलापूर महानगरपालिकेच्या निवडणुकीची धुरा देण्यात आली. फारुख शाब्दी आणि शौकत पठाण यांच्यात तीव्र राजकीय संघर्ष झाला. यातूनच एमआयएम पक्षाचे सोलापुरात पाणीपत होणार अशी चर्चा असताना आठ जागांसह दुसऱ्या क्रमांकाचा पक्षवाटत असतानाच पक्षप्रमुख असदुद्दीन ओवेसी यांच्या जाहीर सभेचा करिष्मा चालला.

निवडणुकीत प्रभाग क्रमांक 14 आणि 20 हे एमआयएमचे बालेकिल्ले ठरले. मुस्लिम बहुल असलेल्या या भागांमध्ये पक्षाने सुरुवातीपासूनच आघाडी घेत निर्णायक वर्चस्व राखले. विरोधी पक्षांकडून जोरदार प्रयत्न झाले, मात्र एमआयएमची संघटनात्मक पकड, स्थानिक नेतृत्व आणि मतदारांशी असलेला थेट संवाद यामुळे येथे पक्षाला भक्कम यश मिळाले. गेल्या टर्ममध्ये एमआयएमचे 9 नगरसेवक निवडून आले होते, तर यंदाच्या टर्ममध्ये 8 नगरसेवक निवडून आले आहेत. हैदराबादची टीम सोलापुरात ठाण मांडून बसली होती. यातील 50 जणांनी मिळून सोलापुरात काँग्रेसचा गड उद्धवस्त केला पण भाजपला याचा फायदा झाला.

दरम्यान, आगामी काळात महापालिकेतील चर्चांमध्ये, धोरणात्मक निर्णयांमध्ये आणि अल्पसंख्याक प्रश्नांवर एमआयएमचा आवाज अधिक ठळकपणे ऐकू येण्याची शक्यता आहे. संघटनात्मक बांधणी, स्थानिक प्रश्नांवर लक्ष आणि मतदारांशी थेट संवाद महत्त्वाचा ठरतो. एमआयएमने अंतर्गत मतभेद असूनही प्रतिष्ठा राखत आपले अस्तित्व मजबूत केले आहे.