आई राजा उदो उदो! चिमुकली पाऊले भक्तीच्या वाटेवर, कोजागिरीसाठी तुळजापूरच्या मार्गावर गर्दी

सोलापूर : नुकताच नवरात्री उत्सव मोठ्या उत्साहात साजरा झाला. तुळजापूर येथील तुळजाभवानी मंदिरात लाखो भक्तांनी देवीचं दर्शन घेतलं. पण तुळजापूरकडे जाणारा भक्तांचा लोंढा अजूनही कायम असून सोलापूर - तुळजापूर महामार्गावर 'आई राजा उदो उदो'चा गजर सुरू आहे. नवरात्रीनंतर कोजागिरी पौर्णिमेसाठी महाराष्ट्रासह आंध्रप्रदेश आणि कर्नाटकातील भाविक तुळजापूरला पायी जातात. विशेष म्हणजे या भक्तीच्या वाटेवर अनेक चिमुकली पाऊलेही दिसत आहेत.

साडेतीन शक्ती पिठापैकी एक शक्तीपीठ म्हणून तुळजाभवानी मंदिराची ओळख आहे. दसरा उत्सव झाल्यानंतर कोजागिरी पौर्णिमेला मोठ्या उत्साहात भाविकांचे जत्थे तुळजापूरला निघतात. सोलापूरसह कर्नाटकातील विजापूर, बागलकोट, कलबुर्गी, गदग तसेच आंध्र प्रदेश, तेलंगणातील भाविकही तुळजापूरला येतात. कोजागिरीला तुळजापुरात लाखो भाविकांची मांदियाळी असते.