शून्यातून केली स्टुडिओची सुरुवात ते 200 हून अधिक लघुपटांची निर्मिती, सोलापूरच्या सचिन जगताप यांची अनोखी गोष्ट!

सोलापूर : मुंबईमध्ये 'अल्ट्रा' कंपनीत विविध चित्रपट आणि दूरचित्रवाणी वाहिन्यांवरील मालिकांचे 'एडिटिंग' करणाऱ्या सचिन जगताप यांनी सोलापूर हीच आपली कर्मभूमी मानली आणि एका वेगळ्या क्षेत्रात स्वतःचे नाव कमावले. 'सिनियर एडिटर' म्हणून उत्तम नोकरी सुरू असतानाही ती नोकरी सोडून सचिन जगताप हे सोलापूर येथे आले आणि 'मोशन फिल्म स्टुडिओ'ची त्यांनी शून्यातून सुरुवात केली. आज जाणून घेऊयात, त्यांच्या या अनोख्या प्रवासाबद्दल.

आतापर्यंत जवळपास 200 हून आधिक लघुपट, अनेक संस्था, व्यक्ती आणि सामाजिक विषयांवरील जवळपास 10 हजार माहितीपटाचे संकलन आणि निर्मिती सचिन जगताप यांनी केली आहे. यामध्ये केवळ सोलापूरचे माहितीपट, लघुपट आणि चित्रपटाच्या निर्मिती आणि एडिटिंगचे काम होते, असे नाही तर पुणे-मुंबई यासह महाराष्ट्र, भारत आणि परदेशातील कित्येक व्हिडिओची कामे करून ग्राहकांचे मन सचिन यांनी जिंकले आहे. मोशन फिल्म स्टुडिओ'ची वार्षिक उलाढाल मोठी आहे.