आधी कुत्रा चावला मग मांजर, दुर्लक्ष करणाऱ्या ठाण्यातील तरुणाचा दीड महिन्यांनी झाला भयावह शेवट!

शुभम मनोज चौधरी असं मृत पावलेल्या २७ वर्षीय तरुणाचं नाव आहे. तो कल्याण पश्चिम मधील गोल्डन पार्क इमारतीत वास्तव्याला होता. तर शुभमचे वडील घाटकोपर इथल्या औषधाच्या दुकानात काम करत होते. त्याने डिप्लोमा पर्यंतचं शिक्षण देखील घेतलं होतं. दीड महिन्यापूर्वी शुभम राहत्या इमारतीच्या पार्किंगमध्ये गेला होता. यावेळी एका भटक्या कुत्र्याने त्याच्या पायाचा चावा घेतला. यात त्याला दुखापतही झाली. मात्र ही किरकोळ बाब समजून त्याने याकडे दुर्लक्ष केलं. श्वानदंश होऊनही त्याने कोणताही उपचार घेतला नाही.

या घटनेनंतर मागील आठवड्यात त्याला एका मांजरीनं देखील चावा घेतला होता. ही बाबही किरकोळ समजून शुभमने याकडे दुर्लक्ष केलं. पण अशाप्रकारे भटक्या प्राण्याने चावा घेऊनही याकडे दुर्लक्ष करणं शुभमच्या जीवावर बेतलं आहे. मांजरीनं चावा घेतल्यानंतर आठवडाभरातच १० डिसेंबरला शुभमची प्रकृती बिघडली. कुटुंबीयांनी त्याला खासगी रुग्णालयात उपचारासाठी दाखल केलं, मात्र त्यांच्या प्रकृतीत काहीच सुधारणा होत नव्हती.

प्रकरण गंभीर असल्याचं लक्षात आल्यानंतर शुभमला उपचारासाठी कळवा येथील रुग्णालयात हलवण्यात आलं. मात्र इथंही त्याच्यावर ठोस उपचार होऊ शकले नाही. शेवटी शुभमला मुंबईतल्या कस्तुरबा रुग्णालयात नेण्यात आलं. या ठिकाणी डॉक्टरांनी शुभमचे प्राण वाचवण्यासाठी शर्थीचे प्रयत्न केले, मात्र १२ डिसेंबर रोजी शुभमचा दुर्दैवी अंत झाला. तो चौधरी कुटुंबाचा एकुलता एक मुलगा होता. मुलाच्या अशाप्रकारच्या मृत्यूने चौधरी कुटुंबीयांना देखील मोठा धक्का बसला आहे.