International Dog Day : मुंबई पोलिसांनी केला पोलीस डॉग लिओचा सन्मान, अशी आहे त्याची कहाणी, VIDEO

मुंबई : 26 ऑगस्ट हा दिवस आंतरराष्ट्रीय श्वान दिन म्हणून साजरा केला जातो. आपल्या घराचा राखणदार, पोलीस किंवा सैन्यदलात काम करणारा, विश्वासू साथीदार आणि सहायक प्राणी म्हणून कुत्र्यांनी समाजात बजावलेल्या विविध भूमिकांचे कौतुक करण्यासाठी हा दिवस साजरा केला जातो.

मुंबईतील पोलीस डॉग लिओ हा मुंबईतील पोलीस दलात काम करणारा अत्यंत विश्वासू श्वान आहे. तो साडेसात वर्षांचा असून त्याने आतापर्यंत अनेक महत्त्वाच्या केस सोडवण्यामध्ये पोलिसांची मदत केलेली आहे. खुनाची केस, मिसिंग केस, अपहरण, चोरी या सगळ्या प्रकरणांमध्ये लिओची मदत झालेली आहे.

एका अपहरणाच्या केसमध्ये तर पोलीस डॉग लिओने फक्त 90 मिनिटांमध्ये हरवलेल्या मुलाचा शोध घेतला होता. हा शोध फक्त त्याने त्याच्या कपड्यांच्या वासावरून घेतला होता. यावरून त्याची बुद्धिमत्ता आणि कर्तबगारी दिसून येते. चोरीच्या केस मध्ये सुद्धा एकदा लिओने सांगितल्यामुळे मोठ्या प्रकरणाचा छडा लागला.