दुष्काळी भागातील शेतकऱ्याची कमाल, 2 एकरात कसं मिळवलं 75 लाखांचं उत्पन्न?, Video

कोरेगाव तालुक्यातील सोळशी परिसराची दुष्काळी भाग म्हणून ओळख आहे. या परिसरात पिण्यासाठी पुरेसं पाणी नाही तर शेतीसाठी पाणी कुठून आणणार? अशी स्थिती आहे. पण येथील शेतकरी जालिंदर सोळसकर यांनी आधुनिक शेतीची कास धरली. शेती आणि पाण्याचे योग्य व्यवस्थापन करून त्यांनी तरकारी पिकांची शेती केली. यामध्ये त्यांना चांगला नफा मिळाला आहे.

जालिंदर सोळसकर यांनी ड्रीप इरिगेशनचा वापर करून ढोबळी मिरची लागवड केली. पेपर मिलिशन, स्टेजिंग करून कमी पाण्यात पीक नियोजन केले. ढोबळी मिरचीची लागवड करून 5 महिने झाले. 5 महिन्यांमध्ये 13 वेळा तोडणी झाली आहे. जवळपास एका तोडणी मध्ये तब्बल 13 टन माल निघाला. आतापर्यंत 150 टन मालाची तोडणी करून ती विक्री देखील केल्याचे सोळसकर सांगतात.

ढोबळी मिरचीचा प्लॉट हा प्रामुख्याने दोन ते तीन महिने चालतो. मात्र, साळसर सांगतात की त्यांचा प्लॉट 8 महिने चालवणार आहे. या ढोबळी मिरचीची लागवड करताना योग्य काळजी घेतली. सेकिंग, भुरी, यांसारखे कोणतीही हानी होणार नाही यासाठी वेळोवेळी औषध फवारणी केली. उन्हाळ्यामध्ये त्याचबरोबर थंडीमध्ये पिकाला कोणती इजा होऊ नये याची काळजी घेत यासाठी ऍग्रो सेल्फ, ॲग्रो मॅजिक या केमिकलचा वापर केला. त्या जोडीला हर्बल केमिकलचा वापर देखील कमी प्रमाणात केला गेला आहे. त्यामुळे दोन एकर मध्ये 150 टनाहून अधिक माल त्यांनी काढला आहे.

2 एकरामध्ये घेतलेल्या ढोबळी मिरचीचा दर हा 60 रुपये तर कधी 70 रुपये किलो असा होता. आजचा भाव धरला तर 40 ते 45 रुपये किलो एवढा आहे. या सर्वाची सरासरी पकडून दर 50 रुपये एवढा धरला तर आतापर्यंत 75 लाख रुपये उत्पन्न मिळाले आहे. या मिरचीच्या लागवडीचा खर्च 10 लाख रुपये झाला आहे. त्यामुळे 2 एकरात 65 लाख रुपये निव्वळ नफा या मिरचीच्या लागवडीमुळे मिळाल्याचे सोळसकर यांनी सांगितले.