ऑफिसची कटकट संपली, आता रेल्वे स्टेशनवर बसून करता येणार काम, मुंबई सेंट्रलला वेगळाच पॅटर्न!

जानेवारी महिन्यात मुंबईतील प्रमुख स्थानकांवर डिजिटल लाउंज म्हणजेच विश्रामगृह कम को-वर्किंग स्पेस उभारण्याचा निर्णय घेण्यात आला होता. त्याच अनुषंगाने मुंबई सेंट्रल स्टेशनवर हा उपक्रम राबवला जात आहे. सुमारे 2.71 कोटी रुपये खर्चातून आणि 1,712 चौरस फूट क्षेत्रफळात हे लाउंज उभारले जात आहे. प्रवाशांना ट्रेनची वाट पाहताना काम करता यावे ऑफिसची मिटिंग अटेंड करता यावी किंवा विद्यार्थ्यांना अभ्यासासाठी शांत जागा मिळावी या उद्देशाने हा अभिनव उपक्रम सुरू केला जात आहे.

सध्या स्टेशनवर प्रवाशांना सामान्य प्रतीक्षालय किंवा शुल्क घेणाऱ्या एक्झिक्युटिव्ह लाउंजचा पर्याय उपलब्ध आहे. मात्र तिथे ऑफिस किंवा कॉलेजचे काम आरामात करता येत नाही. नवीन डिजिटल लाउंजमध्ये मात्र मोफत वीज, आरामदायक खुर्ची-टेबल, उच्चगती वायफाय, पुरेसे प्लग पॉइंट्स आणि कॅफे सुविधा उपलब्ध असतील. त्यामुळे ट्रेनची वाट पाहताना हॉटेल किंवा कॅफेमध्ये काम करण्याची गरज राहणार नाही.

पश्चिम रेल्वेचे मुख्य जनसंपर्क अधिकारी विनीत अभिषेक यांनी सांगितले की, “डिजिटल लाउंज ही सुविधा सुरू झाल्यानंतर व्यावसायिक, विद्यार्थी तसेच सामान्य प्रवाशांना स्टेशनवर काम करणे अधिक सोयीचे होईल.” रेल्वे प्रशासनानेही दरवर्षी सुमारे 50 लाख रुपयांचे उत्पन्न या लाउंजमधून मिळेल असा अंदाज वर्तवला आहे.

ही सुविधा फक्त प्रवाशांसाठीच नाही तर मुंबईतील नागरिक, फ्रीलान्सर आणि वर्क फ्रॉम होम करणारे कर्मचारी यांनाही उपयुक्त ठरणार आहे. घरी योग्य वातावरण किंवा इंटरनेटची सुविधा नसल्याने अनेक जण कॅफेमध्ये काम करतात अशांसाठी ही जागा उत्कृष्ट पर्याय ठरणार आहे. खाद्यपदार्थांची दुकानेही सुरू होणार असल्याने कोणालाही खाण्यापिण्याची अडचण भासणार नाही.

मुंबई सेंट्रल स्टेशनवरील हे डिजिटल लाउंज उभारले गेल्यानंतर रेल्वे स्टेशन ही केवळ प्रवासाची जागा न राहता, कामासाठीही आकर्षक आणि आधुनिक पर्याय ठरणार आहे.