Rain in Maharashtra : कोकण, मध्य महाराष्ट्राला मुसळधार पावसाचा इशारा, तर विदर्भातील या 2 जिल्ह्यांना रेड अलर्ट

मुंबई : राज्यात पावसाचा जोर काहीसा कमी झाला असला तरीही काही ठिकाणी पाऊस होत आहे. आता पुन्हा एकदा कोकण आणि मध्य महाराष्ट्रातील काही जिल्ह्यांना हवामान विभागाने मुसळधार पावसाचा इशारा दिला आहे. कोकणातील रायगड, रत्नागिरी आणि सिंधुदुर्ग या जिल्ह्यांमध्ये हवामान विभागाने मुसळधार पावसाचा इशारा दिला आहे. तर मध्य महाराष्ट्रातील पुणे, सातारा आणि कोल्हापूर जिल्ह्यांमध्येही हवामान विभागाकडून मुसळधार पावसाचा इशारा देण्यात आला आहे. तसेच विदर्भातील गडचिरोली, चंद्रपूर या जिल्ह्यांना रेड तर गोंदिया जिल्ह्याला ऑरेंज अलर्ट देण्यात आला आहे. राज्यात पावसाची स्थिती कशी राहील, याचबाबतचा हा आढावा.

राज्याची राजधानी असलेल्या मुंबईमध्ये मागील 24 तासांमध्ये हलक्या पावसाची नोंद करण्यात आली. पुढील 24 तासांमध्ये मुंबईमधील आकाशी अंशतः ढगाळ राहून मधून मध्यम स्वरूपाच्या पावसाची शक्यता आहे. कमाल तापमान 32 तर किमान तापमान 26 अंश सेल्सिअस असेल. तर कोकणातील जिल्ह्यांमध्ये तुरळक ठिकाणी मुसळधार पावसाचा इशारा देण्यात आला आहे.