अमेरिकन महिला भारतात आली, ‘त्या’ ट्वीटनं मुंबई पोलीस अलर्ट, तपासाची चक्रे फिरली अन् धक्कादायक कांड समोर

अर्जेंटिना अरियानो या अमेरिकी नागरिक महिला 12 जानेवारी रोजी एका लग्नसोहळ्यासाठी भारतात आल्या होत्या. मुंबई आंतरराष्ट्रीय विमानतळावरून त्यांना जवळच असलेल्या हिल्टन टॉवर्स हॉटेल येथे जायचे होते. विमानतळ परिसरात उपस्थित असलेल्या एका व्यक्तीने त्यांना टॅक्सी उपलब्ध करून दिली. मात्र अवघ्या 400 मीटर अंतरासाठी टॅक्सीचालकाने तब्बल 200 डॉलर इतके भाडे आकारल्याने त्या चकित झाल्या.

हा अनुभव अर्जेंटिना अरियानो यांनी एक्सवर पोस्ट करत मांडला. पोस्टसोबत त्यांनी संबंधित टॅक्सीचा रजिस्ट्रेशन नंबर असलेले छायाचित्रही जोडले. या घटनेनंतर काही नेटकऱ्यांनी भारताविरोधात टीका करत टोमणे मारले. त्यावर उत्तर देताना अर्जेंटिना म्हणाल्या, “भारतीय लोक दयाळू आणि काळजी घेणारे आहेत. त्यांचा स्वभाव आणि खाद्यसंस्कृती मला खूप आवडते. केवळ दोन भामट्यांमुळे संपूर्ण देश आणि भारतीयांबद्दल मत बनवणे चुकीचे आहे. भारत खूप सुंदर आहे.”

या घटनांमुळे परदेशी नागरिकांच्या सुरक्षिततेचा प्रश्न पुन्हा एकदा ऐरणीवर आला असून मुंबई पोलिसांकडून अधिक कडक उपाययोजना राबवण्याची गरज व्यक्त केली जात आहे.