Ahmadabad Plane Crash: अहमदाबाद विमान अपघातात 50 जणांचा मृत्यू, मृतांचा आकडा वाढण्याची भीती

या अपघातात आतापर्यंत 50 लोकांचा मृत्यू झाल्याची माहिती समोर आली आहे. मृतांचा आकडा आणखी वाढण्याची भीती व्यक्त केली जात आहे.

गुजरातमधील अहमदाबाद विमानतळाजवळ हा मोठा अपघात झाला. विमानतळाशेजारील मेघानी नगरमध्ये एअर इंडियाचे विमान उड्डाणादरम्यान कोसळले. हे आंतरराष्ट्रीय विमान अहमदाबादहून लंडनला जात असल्याचे सांगण्यात येत आहे. अपघातानंतर सर्वत्र धुराचे लोट दिसत होते आणि अग्निशमन दलाच्या अनेक गाड्या बचावकार्यासाठी घटनास्थळी पोहोचल्या आहेत.

अपघातानंतर अनेक व्हिडिओ समोर येत आहेत. असे सांगितले जात आहे की विमान जिथे कोसळले ते मेघानी नगर हे निवासी क्षेत्र आहे आणि अशा परिस्थितीत जीवित आणि वित्तहानी होण्याची शक्यता आहे. विमानतळापासून मेघानी नगरचे अंतर सुमारे 15 किलोमीटर आहे. अपघातानंतर लगेचच अग्निशमन दलाच्या ८ गाड्या घटनास्थळी पोहोचल्या आणि आगीवर नियंत्रण मिळवण्याचे शर्थीचे प्रयत्न सुरू आहेत. जखमींना स्थानिक रुग्णालयात दाखल करण्यात येत आहे.

या विमानात 242 प्रवासी होते. 10 क्रू मेंबर, 2 लहान मुलं, 232 प्रवासी असल्याची माहिती समोर आली आहे. एअर इंडियाचं AI 171 विमान आज दुपारी क्रॅश झालं. विमानाचा मागचा भाग कोणत्या तरी गोष्टीला धडकल्याचं सांगितलं जात आहे. नेमका अपघात कशामुळे झाला याचं कारण अद्याप समोर आलं नाही.