Sharad Pawar : खासदारांच्या आंदोलनात शरद पवार जखमी? दाव्याने खळबळ, इंडिया आघाडीचा मोर्चा पोलिसांनी रोखला

विरोधी पक्ष नेते राहुल गांधी यांच्यासह आघाडीतील 25 घटक पक्ष सहभागी झाले. राहुल गांधी, मल्लिकार्जुन खर्गे, सोनिया गांधी, शरद पवार, संजय राऊत, अखिलेश यादव, प्रियांका गांधी, सुप्रिया सुळेंसह आदींसह जवळपास 300 खासदार मोर्चात सहभागी झाले होते. विरोधी पक्षनेते राहुल गांधी यांनी काही दिवसांपूर्वीच कर्नाटकमधील एक विधानसभा मतदारसंघात झालेल्या कथित बोगस मतदारांचा पुराव्यांसह आरोप केला होता. त्यानंतर विरोधक चांगलेच आक्रमक झाले आहेत. भाजपने निवडणूक आयोगाच्या संगनमताने लोकसभा निवडणूक जिंकली असल्याचा आरोप विरोधकांनी केला.

कोणत्याही परिस्थितीत निवडणूक आयोगाच्या कार्यालयावर मोर्चा काढू न देण्याचा प्रयत्न दिल्ली पोलिसांनी केला. मोर्चासाठी इंडिया आघाडीचे खासदार संसदेच्या परिसरात जमले. त्यावेळी पोलिसांनी संसदेच्या प्रवेशद्वाराजवळच बॅरिकेट लावत खासदारांची कोंडी केली. दिल्ली पोलिसांसह दंगल नियंत्रक पथकांसह मोठ्या प्रमाणावर सुरक्षा दल तैनात होते.

पोलिसांनी संसद परिसरात बॅरिकेट्स लावत खासदारांना अटकाव केला. त्यामुळे काहीसा गोंधळ उडाला. पोलिसांसोबत संघर्ष होण्याची स्थिती उद्भवली होती. याच दरम्यान एकाने माध्यमांशी बोलताना शरद पवार जखमी झाल्याचा दावा केला.

विरोधकांनी केंद्रीय निवडणूक आयोगाकडे ई-व्होटर लिस्टची मागणी केली आहे. त्याशिवाय, मतदानाच्या वेळीचे सीसीटीव्ही फुटेजची मागणीदेखील विरोधकांनी केली आहे. निवडणूक आयोगाची भूमिका संशयास्पद असल्याचा आरोप विरोधकांकडून सातत्याने करण्यात आला.

पोलिसांनी बॅरिकेट्स लावून मोर्चाला अटकाव केला. मात्र, महिला खासदारांनी बॅरिकेट्सवर चढत निवडणूक आयोगाच्या कार्यालयाकडे कूच करण्याचा प्रयत्न केला.