प्रेम धोका अन् हत्या! क्राइम सीरिज पाहून रचला डाव, लिव्ह इन पार्टनरने UPSC करणाऱ्या बॉयफ्रेंडला संपवलं

पोलीस आणि फॉरेंसिक टीमने घटनास्थळावरून पुरावे गोळा करायला सुरुवात केली. खोली पूर्णपणे जळून खाक झाली होती, पण त्या राखेतही काही महत्त्वाचे पुरावे पूर्ण जळून खाक झाले नव्हते. जे पोलिसांच्या हाती लागले, त्यानंतर हा अपघात नसून घातपातच आहे हे पोलिसांच्या लक्षात आलं आणि त्या दिशेनं तपास सुरू झाला. या तपासादरम्यान, एक गोष्ट अत्यंत आणखी कोड्यात टाकणारी होती.

हत्या हे तर आता निश्चितच झालं. पोलिसांनी आजूबाजूच्या परिसरातील सीसीटीव्ही फुटेज तपासण्यास सुरुवात केली. त्याच CCTV मध्ये हैरान करणारे सत्य समोर आलं. फुटेजमध्ये स्पष्ट दिसले की, आग लागण्यापूर्वी एक मुलगा आणि एक मुलगी आपला चेहरा कपड्याने झाकून त्या फ्लॅटमध्ये शिरले होते. बरोबर ३९ मिनिटांनंतर, म्हणजेच रात्री २ वाजून ५७ मिनिटांनी, ते दोघेही तिथून घाईघाईत बाहेर पडले. त्या दोघांनी फ्लॅट सोडल्यानंतर काही मिनिटांतच आग लागल्याचं CCTV मध्ये स्पष्ट दिसलं. आता पोलिसांना खात्री पटली होती की, ही घटना अपघात नसून नियोजित हत्या आहे. सीसीटीव्ही फुटेजच्या मदतीने पोलिसांनी त्या मुलीची ओळख पटवली.

सीसीटीव्हीमध्ये दिसलेल्या मुलीचे नाव अमृता चौहान आहे. मुरादाबादची रहिवासी असलेली ही मुलगी फॉरेंसिक सायन्समध्ये बी.एस.सी.चे शिक्षण घेत होती. तिच्यासोबत असलेला मुलगा सुमित कश्यप (वय २७) हा तिचा 'एक्स बॉयफ्रेंड' होता. दोघांचे मोबाईल स्विच ऑफ होते, पण त्यांची शेवटची लोकेशन ई-६० फ्लॅटच्या आसपासचं मिळालं. १२ दिवसांच्या अथक तपासानंतर, १८ ऑक्टोबरला पोलीस अमृता चौहानच्या मुसक्या आवळण्यात यशस्वी झाले.

दोघांनाही ताब्यात घेतल्यानंतर गुन्हा कबुल करण्यासाठी तयार नव्हते. मात्र पोलिसांचा खाक्या पडला आणि अमृताने पोपटासारखं सगळं घडाघडा सांगून टाकलं. आपणच हत्या केल्याचं अखेर तिने कबूल केलं. तिने जे सांगितलं ते एका क्राइम सिनेमापेक्षा कमी नव्हतं. इतक्या भयानक प्रसंगातून ती गेली आणि त्यानंतर ती चीड तिच्या डोक्यात बसली. अमृताने सांगितलं की ब्रेकअपनंतर ती रामकेशसोबत लिव-इन रिलेशनशिपमध्ये राहत होती. याच काळात रामकेशने अमृताचे काही खाजगी फोटो आपल्या मोबाईल आणि हार्ड डिस्कमध्ये सेव्ह करून ठेवले. जेव्हा त्यांचे नाते तुटले, तेव्हा रामकेशने याच फोटोंच्या आधारावर अमृताला ब्लॅकमेल करण्यास सुरुवात केली.

५ ऑक्टोबरच्या रात्री अमृता, सुमित आणि त्यांचा तिसरा साथीदार संदीप कुमार रामकेशच्या खोलीत पोहोचले. सर्वप्रथम, त्या तिघांनी मिळून रामकेशचा गळा घोटला. पुरावे नष्ट करण्यासाठी त्यांनी मृतदेहावर घरात ठेवलेले सगळे तेल, तूप आणि दारू ओतली आणि आग लावली. आरोपी सुमित हा एलपीजी सिलेंडर सप्लायचे काम करत असल्याने त्याला सिलेंडरने आग पसरवण्याची पद्धत माहीत होती. त्याने सिलेंडरचा वॉल्व उघडा सोडला, जेणेकरून काही मिनिटांतच मोठा स्फोट होऊन ही घटना सिलेंडर स्फोटामुळे झालेला अपघात वाटेल.