प्रत्येक भारतीय संतापलाय... PM मोदी यांचा सरन्यायाधीश भूषण गवई यांन फोन, हल्ल्याच्या घटनेचा निषेध

सर्वोच्च न्यायालयाचे कामकाज सुरू झाल्यानंतर एका ज्येष्ठ वकिलाने पायातील बूट काढून सरन्यायाधीश गवई यांच्या दिशेने भिरकाविण्याचा प्रयत्न केला. मात्र न्यायालयात उपस्थित सुरक्षारक्षकांनी तसेच पोलिसांनी तत्काळ आरोपीला ताब्यात घेतले. आरोपीला न्यायालयाच्या बाहेर नेत असताना सनातनचा अपमान सहन करणार नाही, असे म्हणत त्याने सरन्यायाधीश गवई यांचा निषेध केल्याचे उपस्थितीतांनी सांगितले.

भारताचे सरन्यायाधीश भूषण गवई यांच्याशी दूरध्वनीवरून चर्चा केली. आज सकाळी सर्वोच्च न्यायालयात त्यांच्यावर झालेल्या हल्ल्याच्या प्रयत्नाने प्रत्येक भारतीय संतापला आहे. आपल्या समाजात अशा निंदनीय कृत्यांना स्थान नाही. ते पूर्णपणे निषेधार्ह आहे. अशा परिस्थितीला तोंड देताना न्यायमूर्ती गवई यांनी दाखवलेल्या शांततेचे मी कौतुक करतो, असे नरेंद्र मोदी एक्स पोस्टवर म्हणाले. तसेच गवई यांची न्यायमूर्तींच्या मूल्यांप्रती आणि आपल्या संविधानाच्या आत्म्याला बळकटी देण्याप्रती त्यांची वचनबद्धता अधोरेखित करते, असे कौतुकही त्यांनी केले.

आरोपीला न्यायालयातून बाहेर नेल्यानंतरही या घटनेची चर्चा दबक्या आवाजात सुरू होती. मात्र सरन्यायाधीश गवई यांनी आपण अशा घटनांनी विचलित होत नाही किंबहुना प्रभावितही होत नाही. कामकाज सुरू करू, असे म्हणून त्यांनी पुन्हा कामाला सुरुवात केली. या संपूर्ण घटनेनंतर सरन्यायाधीश गवई अतिशय शांत होते. त्यांनी अतिशय संयमाने परिस्थिती हाताळली.

सरन्यायाधीश गवई यांच्या दिशेने बूट फेकण्याचा प्रयत्न करणारा आरोपी वकिलाचे नाव राकेश किशोर असे आहे. गेल्या अनेक वर्षांपासून ते सर्वोच्च न्यायालयात वकिली करतात. राकेश किशोर हा सर्वोच्च न्यायालयातील बारचा २०११ पासून सदस्य आहे.