टपाल खात्याचा मोठा निर्णय! 'रजिस्टर्ड एडी' सेवा 1 सप्टेंबरपासून होणार बंद, आता 'स्पीड पोस्ट' एकमेव पर्याय!

टपाल विभागाच्या काही लोकप्रिय सेवांमध्ये 'रजिस्टर्ड टपाल' सेवेचा समावेश होता. काळाच्या ओघात आंतरदेशीय पत्रे, साधे पोस्टकार्ड यांसारख्या सेवा बंद पडल्या किंवा त्यांचा वापर अत्यंत कमी झाला. मात्र, 'रजिस्टर्ड टपाल' सेवा आजही लोकप्रियता टिकवून आहे. या सेवेत टपाल पाठवताना त्याची पोहोच जागेवर (एडी स्लिप) मिळते, शिवाय टपाल पोहोचल्यानंतर ते घेणाऱ्याच्या सहीमुळे पुन्हा एकदा पोहोच मिळते. त्यामुळे 'रजिस्टर्ड टपाल' सेवा अत्यंत खात्रीशीर मानली जाते. विशेषतः शासकीय कार्यालयातून खूप मोठ्या प्रमाणात या सेवेचा वापर होतो.

ब्रिटिश काळापासून, म्हणजे सुमारे 171 वर्षांपासून ही सेवा सुरू होती. ती आता जनसामान्याला निरोप देईल. याचे कोणतेही स्पष्ट कारण टपाल खात्याने दिलेले नाही. मात्र, या सेवेला स्पीड पोस्टचा पर्याय सुचवला आहे.

टपाल विभागाच्या काही लोकप्रिय आणि अधिक कार्यक्षम सेवेसाठी हा निर्णय घेण्यात आल्याचे टपाल खात्याने म्हटले आहे. स्पीड पोस्टद्वारे ग्राहकांना कमीत कमी वेळेत पार्सल पोहोचवणार आहे आणि टपाल कोठे पोहोचले याचे ट्रॅकिंगही (Tracking) करता येणार आहे. 'रजिस्टर्ड टपाल' सेवा 31 ऑगस्टपर्यंत सुरू राहणार आहे. मात्र, 31 ऑगस्ट रोजी रविवार असल्याने, ही सेवा प्रत्यक्षात 30 ऑगस्टपासून निरोप घेईल.