कोल्हापूरची चिंता मिटली! 17 धरणे तुडुंब भरली; उन्हाळ्यात पाण्याची समस्या सुटली; पण धाकधूक कायम!

यंदा, मे महिन्यातच दुसऱ्या आठवड्यापासून पावसाने सुरुवात केली. मध्यंतरीचा काही कालावधी वगळता एकसारखा पाऊस सुरू आहे. जुलैच्या शेवटच्या आठवड्यापर्यंत जिल्ह्यातील बहुतेक धरणे भरली आहेत. सध्या जिल्ह्यातील 17 धरणांमध्ये 93.66 टीएमसी पाणीसाठा आहे. वर्षभर त्याचे योग्य पद्धतीने नियोजन केल्यास जूनपर्यंत पिण्यासाठी आणि शेतीसाठी पाणी मुबलक मिळेल.

सुरुवातीच्या दोन महिन्यांतच धरणे तुडुंब भरली आहेत. अजून निम्मा पावसाळा बाकी आहे. या कालावधीतही जोरदार पाऊस होईल, असा अंदाज असल्याने हे दोन महिने कोल्हापूरकरांसाठी धाकधूक वाढवणारे ठरू शकतात, कारण अतिवृष्टीचा धोका कायम असतो. विशेष म्हणजे, मागील 30 वर्षे राधानगरी, पन्हाळा व गगनबावडा तालुक्यातील शेतकऱ्यांचे स्वप्न असलेल्या राई (ता. राधानगरी) येथील धामणी प्रकल्पात पूर्ण क्षमतेने पाणी साठले आहे. हे पाणीही यंदा अतिरिक्त म्हणून शेतकऱ्यांसह पिण्यासाठी वापरण्यास मिळणार आहे, ज्यामुळे अनेक वर्षांची प्रतीक्षा संपली आहे. गतवर्षीच्या तुलनेत धरणक्षेत्रात यंदा सलग पाऊस असला तरी अतिवृष्टीसारखा कोसळलेला नाही. त्यामुळे धरणक्षेत्रात गेल्या वर्षाच्या तुलनेत यंदा पाऊस कमीच राहिला आहे.