Satara News : धावत्या दुचाकीवर माकडाची झडप, जखमी पत्नीसमोर पतीचा दुर्दैवी अंत, महाबळेश्वर हादरलं!

गुरुवारी संध्याकाळी आनंद जाधव आणि त्यांची पत्नी महाबळेश्वर शहरातील काम आटोपून आपल्या दुचाकीवरून देवळी गावाकडे परतत होते. तापोळा रस्त्यावरील चिखली परिसरातून जात असताना, खाद्याच्या शोधात असलेल्या एका माकडाने अचानक त्यांच्या चालत्या दुचाकीवर झडप घेतली. अनपेक्षित हल्ल्यामुळे आनंद जाधव यांचा गाडीवरील ताबा सुटला आणि दोघेही रस्त्यावर जोरात आपटले.

या घटनेनंतर देवळी आणि आसपासच्या गावांमध्ये शोककळा पसरली आहे. महाबळेश्वर परिसरात माकडांचा उपद्रव ही एक मोठी समस्या बनली आहे. पर्यटकांच्या हातातून खाद्यपदार्थ हिसकावणे, वाहनांवर उड्या मारणे, हे प्रकार नित्याचे झाले आहेत. यापूर्वीही अशा घटनांमुळे छोटे-मोठे अपघात झाले आहेत, पण आता एका व्यक्तीला आपला जीव गमवावा लागल्याने नागरिकांमध्ये संतापाची लाट उसळली आहे. "वनविभाग आणि प्रशासनाने आतातरी जागे होऊन या माकडांचा बंदोबस्त करावा," अशी मागणी संतप्त ग्रामस्थांनी केली आहे.