शरीरावरील 'या' खास खुणा उलगडतात भूतकाळातील रहस्य, तुमच्या अंगावर आहेत का 'असे' निशाण?

आपल्या शरीरावर असलेल्या जन्मखुणा केवळ त्वचेवरचे डाग नसतात, तर त्यामागे अनेक रहस्ये दडलेली असतात, असे मानले जाते. 'सामुद्रिक शास्त्र' आणि अनेक आध्यात्मिक सिद्धांतानुसार, शरीरावरील या खुणांचा थेट संबंध आपल्या मागच्या जन्माशी असतो. या खुणा म्हणजे मागील जन्मातील काही अपूर्ण राहिलेल्या इच्छा, अनुभव किंवा मिळालेल्या जखमांच्या खुणा असू शकतात.

कपाळावर किंवा चेहऱ्यावर खूण : कपाळाच्या मध्यभागी जन्मखूण असणे हे बुद्धिमत्तेचे प्रतीक मानले जाते. असे म्हटले जाते की, अशा व्यक्तीने मागील जन्मात ज्ञानाच्या क्षेत्रात मोठे कार्य केलेले असते. तर चेहऱ्यावर खूण असलेल्या व्यक्ती अत्यंत भावूक आणि बोलक्या असतात. अशा व्यक्तींना या जन्मात अमाप संपत्ती आणि सुख मिळते.

मानेवर असणारी खूण : ज्यांच्या मानेवर विशेष खूण असते, त्या व्यक्ती मागील जन्मात संत, योगी किंवा आध्यात्मिक गुरु असाव्यात, अशी मान्यता आहे. मान ही स्थिरता आणि नेतृत्वाचे प्रतीक आहे. अशा खुणा असलेल्या व्यक्तींमध्ये या जन्मातही संयम आणि इतरांना मार्गदर्शन करण्याची उपजत क्षमता असते.

पायांवर किंवा तळव्यांवर खूण : ज्यांच्या पायावर किंवा विशेषतः तळपायावर जन्मखूण असते, त्यांना भटकंतीची आणि प्रवासाची प्रचंड आवड असते. असे मानले जाते की, या व्यक्तींनी मागील जन्मातही खूप प्रवास केलेला असतो. या जन्मात त्यांना परदेशी जाण्याचे किंवा नवीन ठिकाणे शोधण्याचे अनेक योग येतात.

पाठीवर असलेली खूण : पाठीवर जन्मखूण असणे हे राजेशाही थाट आणि नेतृत्वाचे लक्षण मानले जाते. मागील जन्मात अशा व्यक्ती समाजासाठी आधारस्तंभ होत्या किंवा मोठ्या पदावर होत्या असे मानले जाते. या जन्मातही त्यांना लोकांचा प्रचंड पाठिंबा मिळतो.

छातीवर किंवा हृदयाजवळ खूण : छातीवर असलेली गडद खूण ही मागील जन्मातील एखाद्या गंभीर जखमेचा किंवा अपघाताचा संकेत असू शकते, असे काही मानसोपचार तज्ज्ञांचे मत आहे. अशा व्यक्ती अत्यंत संवेदनशील असतात आणि त्यांच्या आयुष्यात प्रेमाचे स्थान सर्वात वर असते.

विशिष्ट आकाराच्या खुणा : जर जन्मखूण तलवारीसारखी, बाणासारखी किंवा वर्तुळाकार असेल, तर ते मागील जन्मातील युद्धाशी संबंधित मृत्यू किंवा संघर्षाचे प्रतीक मानले जाते. हे त्या आत्म्याने मागील जन्मात दिलेला पराक्रम दर्शवते. टीप : (वरील माहिती सामान्य माहितीवर आधारीत आहेत. न्यूज 18 मराठी याची पुष्टी करत नाही. आपला उद्देश तुमच्यापर्यंत माहिती पोहोचवण्याचा आहे.)