Electric टू-व्हीलर कमी रेंज देतेय? मग लगेच करा हे 5 काम, होईल फायदा

मुंबई : सध्या देशात इलेक्ट्रिक वाहनांची मागणी वाढत आहे. विशेषतः दुचाकी विभागात, भरपूर ऑप्शन उपलब्ध आहेत. कंपन्या बाजारात प्रगत आणि सुरक्षित बॅटरी असलेले मॉडेल्स देखील आणत आहेत. इलेक्ट्रिक स्कूटर चालवण्याचे आणि वापरण्याचे वेगवेगळे मार्ग आहेत, ज्याची माहिती अनेकांना नसते. काही काळ स्कूटर वापरल्यानंतर स्कूटर कमी रेंज देऊ लागते. आता यामागे अनेक कारणे असू शकतात. पण जर काही महत्त्वाच्या गोष्टी लक्षात ठेवल्या तर तुम्हाला चांगली कामगिरी तर मिळेलच पण रेंजही वाढेल.

दुचाकीवर जास्त भार वाहून नेणे टाळा : तुम्ही तुमच्या इलेक्ट्रिक दुचाकीवर नियमितपणे ओव्हरलोड करत असाल तर आजच ते करणे थांबवा. असे केल्याने वाहनावर जास्त ताण येतो ज्यामुळे बॅटरी जलद संपते आणि तुम्हाला कमी रेंजचा सामना करावा लागतो. म्हणून, ईव्हीवर आवश्यक तेवढेच सामान भरा.

स्पीडची काळजी घ्या : तुमची इलेक्ट्रिक दुचाकी एकाच वेगाने चालवा. विनाकारण वेग वाढवणे टाळा कारण यामुळे बॅटरी जलद संपेल आणि तुम्हाला कमी रेंज मिळेल. स्कूटरचा वेग 40-60kmph ठेवा.

टायर्समध्ये योग्य हवेचा दाब महत्त्वाचा : ईव्हीच्या दोन्ही टायर्समधील हवा पूर्णपणे योग्य ठेवा. योग्य हवेचा दाब ऊर्जेचा वापर कमी करतो आणि चांगली रेंज देखील प्रदान करतो. आठवड्यातून एकदा टायरमधील हवेचा दाब योग्यरित्या तपासा. तुम्ही दररोज गाडीने प्रवास करत असाल तर आठवड्यातून दोनदा टायरमधील हवा तपासा. शक्य असल्यास, स्कूटर फक्त इको मोडवर चालवा. यामुळे ऊर्जेचा वापर कमी होतो आणि चांगली रेंज मिळते.

बॅटरीची नियमित काळजी घ्या : इलेक्ट्रिक दुचाकीची सर्व्हिसिंग करा आणि त्याची बॅटरी नियमितपणे तपासा. नेहमी बॅटरी फक्त 80-90% पर्यंत चार्ज करा. असे केल्याने, बॅटरी लाइफ वाढवण्यासोबतच स्कूटरची रेंज देखील वाढते. यासोबतच, बॅटरी पूर्णपणे डिस्चार्ज होण्यापासून वाचवा. बॅटरीची योग्य देखभाल केल्याने तिची क्षमता तसेच लाइफ वाढते.

योग्य मार्ग निवडा, नेव्हिगेशन वापरा : तुमची इलेक्ट्रिक टू-व्हीलर अशा रूटने चालवा जिथे कमी वाहतूक कोंडी असेल. नेहमी स्मूथ आणि शॉर्ट रूट निवडा. नेहमी नेव्हिगेशन वापरा. गाडी चालवताना रिजनरेटिव्ह ब्रेकिंग टेक्नॉलॉजीचा वापर करा, अशा प्रकारे ब्रेक लावताना ऊर्जा बॅटरीमध्ये परत जाते. त्यामुळे स्कूटरची रेंज वाढते.