नववी पास गृहिणी कशी झाली उद्योजक? आवळा प्रक्रिया उद्योगातून महिन्याला 2 लाखांची कमाई

सध्याच्या काळात घरगुती व्यवसायातून काही महिलाही उद्योगाचं आपलं विश्व निर्माण करत आहेत. अशीच काहीशी कहाणी <a href="https://news18marathi.com/maharashtra/jalna/">जालन्यातील</a> संजीवनी जाधव यांची आहे. अवघं नववीपर्यंत शिक्षण झालेल्या संजीवनी यांनी पाच किलो आवळ्यापासून आवळा प्रक्रिया उद्योग सुरू केला.

आता याला व्यापक स्वरुप आलं असून वर्षाकाठी 25 ते 30 लाखांची उलाढाल होतेय. या व्यवसायातून त्यांनी 5 महिला आणि 2 तरुणांना रोजगार उपलब्ध करून दिलाय. शुन्यातून विश्व निर्माण करणाऱ्या संजीवनी ताई यांचा प्रवास अनेकांसाठी प्रेरणादायी आहे.

जालना शहरातील बस स्थानक भागात राहणाऱ्या संजीवनी जाधव या गृहिणी आहेत. सिंदखेडराजा हे त्यांचं मूळ गाव आहे. लग्न झाल्यानंतरच त्या जालना इथे स्थायिक झाल्या. त्यांचे पती जालन्यातील एका खाजगी कंपनीत काम करतात. कमी पगारात मुलांचे शिक्षण शक्य नसल्याने काहीतरी व्यवसाय करावा असं त्यांच्या डोक्यात सतत घोळत होतं.

कृषी विज्ञान केंद्र खरपुडी येथील एक जाहिरात त्यांच्या पतीच्या लक्षात आली. त्यांनी याबद्दल संजीवनी ताईंना सांगितलं. संजीवनी यांनी देखील तत्परतेने या प्रशिक्षण कार्यक्रमात भाग घेतला. पाच दिवसाचं आवळा प्रक्रिया प्रशिक्षण घेऊन ताईंनी लगेचच प्रयोग म्हणून पाच किलो आवळ्यावर प्रक्रिया करून पाहिली. प्रक्रिया केलेला प्रयोग अतिशय सफल झाला.

पुढे संजीवनी ताईंनी आवळ्यावरील प्रक्रिया त्यांनी वाढवत नेली. आवळ्यापासून लोणचं, सुपारी, आवळा कॅन्डी असे अनेक पदार्थ त्यांनी तयार केले. सुरुवातीला घरातच त्यांनी या व्यवसायाला चालवलं. मात्र जेव्हा ग्राहकांचा चांगला प्रतिसाद मिळू लागला. तेव्हा या व्यवसायाला विस्तीर्ण रूप देत जालना एमआयडीसी भागात स्वतंत्र गाळात भाड्याने घेतला.

आज घडीला त्यांच्याकडे जवळपास 150 क्विंटल आवळा दरवर्षी प्रक्रिया केला जातो. यातून त्यांना महिन्याकाठी दीड ते दोन लाख रुपयांची उत्पन्न होते. याच व्यवसायातून त्यांनी पाच महिलांना रोजगार उपलब्ध करून दिलाय. तसेच दोन तरुणांना डिस्ट्रीब्यूटर म्हणून नेमले आहे.

संजीवनी ताईंचा प्रवास सोपा नव्हता. अनेकदा अपमान सहन करावा लागला. शहरातील कुठे यात्रा मेळावा असेल तिथे स्टॉल लावून त्यांनी या व्यवसायाचे मार्केटिंग केले. आज घडीला त्यांच्या व्यवसायाने मोठं रूप धारण केलंय. या कामात त्यांना त्यांच्या पतीची देखील खंबीर साथ मिळाली.

आता या व्यवसायाला त्यांना मोठे रूप द्यायचे आहे. आवळा प्रक्रियेचा व्यवसाय आंतरराष्ट्रीय पातळीवर एक्सपोर्ट करण्यापर्यंत नेण्याचे जाधव कुटुंबीयांचे स्वप्न आहे, असे त्यांनी सांगितले.

आवळा व्यवसायाच्या बळावर माझ्या तिन्ही मुलांची शिक्षण पूर्ण झाले आणि मी देखील आर्थिक दृष्ट्या सक्षम झाल्याचं संजीवनी सांगतात. तसेच इतर महिलांनी देखील छोट्या मोठ्या उद्योग व्यवसायात उतरावे असे आवाहन त्या करतात. आतापर्यंत याच व्यवसायाने त्यांना तब्बल 19 पुरस्कार मिळवून दिलेत. यापैकी शरद पवारांच्या हस्ते मिळालेला पुरस्कार सगळ्यात अविस्मरणीय होता, असं संजीवनी जाधव यांनी सांगितले.