महिलांच्या त्वचेचे मास्क, हाडांचं फर्निचर अन् कवटीची... सीरिअल किलरचं किळसवाणं कृत्य पाहून उडेल थरकाप

मुंबई : लहानपणापासून आपल्याला भीतीदायक गोष्टी आणि रहस्यमय कथा नेहमीच आकर्षित करत आल्या आहेत. भूत-राक्षसांच्या लोककथा असोत किंवा मग खऱ्या खुन्यांच्या थरारक कहाण्या.

याच थरारावर आधारलेली एक भयानक सत्यकथा सध्या पडद्यावर आली आहे. ही कहाणी आहे १९५० च्या दशकातील एका 'कसाई' म्हणून ओळखल्या जाणाऱ्या मारेकऱ्याची, ज्याची क्रूरता ऐकून तुमचा थरकाप उडेल.

सध्याच्या काळात चित्रपट आणि मालिकांमध्ये खऱ्या गुन्हेगारी घटनांवर आधारित कथांना खूप मागणी आहे. याच पठडीतील नेटफ्लिक्सची गाजलेली सीरिज 'मॉन्स्टर' चं तिसरं सीझन नुकतंच प्रदर्शित झालं आहे.

'मॉन्स्टर: द एड गीन स्टोरी' या नावाने हा तिसरा भाग ३ ऑक्टोबर २०२५ रोजी नेटफ्लिक्सवर प्रदर्शित झाला. लेखक आणि निर्माते रायन मर्फी आणि इयान ब्रेनन यांनी या ८ एपिसोडच्या सीरिजमधून ही भयाण कहाणी पुन्हा एकदा लोकांसमोर आणली आहे. ५० ते ६० मिनिटांचे हे एपिसोड हिंदी भाषेतही उपलब्ध आहेत आणि रिलीजनंतर ही सीरिज ओटीटीवर चर्चेत आहे.

या सीरिजमध्ये अभिनेता चार्ली हनम याने क्रूर मारेकरी एड गीन याची भूमिका साकारली आहे. एड गीन हा विस्कॉन्सिनमधील एक सिरीयल किलर होता.

एड गीनच्या विकृत आणि किळसवाण्या कृत्यांनी देशाला हादरवून सोडले होते. तो महिलांच्या मृतदेहांशी अमानुष आणि क्रूर कृत्य करायचा. त्याने दोन महिलांची हत्या केली, तर अनेक मृतदेह चक्क कब्रस्थानातून काढून आणले.

त्यांच्या त्वचेपासून मुखवटे, हाडांपासून फर्निचर आणि कवटीचा उपयोग कटोरी बनवण्यासाठी करायचा. त्याची आई ऑगस्टा हिचा त्याच्यावर असलेला कठोर पगडा आणि त्याचे भयानक आयुष्य यात दाखवण्यात आले आहे.

या मालिकेची ही सत्य कथा यापूर्वीही 'सायको' आणि 'द सायलेन्स ऑफ द लॅम्ब्स' यांसारख्या गाजलेल्या चित्रपटांना प्रेरणा देऊन गेली आहे. IMDb वर या सीरिजला सध्या 7.2/10 इतकी चांगली रेटिंग मिळाली आहे.