Dashavatar Movie : फक्त दशावतार, दशावतार आणि दशावतारच! 'कांतारा'ला पुरून उतरतोय; सकाळी 7:30 ते रात्री 11:55 हाऊसफुल्ल

मागील महिन्याभरापासून बॉक्स ऑफिसवर दशावतार या मराठी सिनेमाचा बोलबाला पाहायला मिळतोय. कोकणातील अस्सल मातीत तयार झालेला दशावतार हा सिनेमा हिंदी सिनेमांना काँटे की टक्कर देतोय.

सिनेमा रिलीज झाल्यापासून हाऊसफुल्ल असल्याचं पाहायला मिळतंय. सिनेमाचं दमदार कमाई करण्यात यश मिळवलंय पण त्याचबरोबर एका महत्त्वाच्या विषयावर भाष्य केलं.

दशावतार या सिनेमानं सहाव्या आठवड्यात पदार्पण केलं आहे. प्रेक्षकांनी दिलेल्या भरगोस प्रतिसादाबद्दल सिनेमाचे दिग्दर्शक सुबोध खानोलकर यांनी प्रेक्षकांचे आभार मानले आहेत. इतकंच नाही तर सकाळी 7:30 ते रात्री 11:55 चे शो हाऊसफुल्ल असल्याचं देखील सांगितलं.

सुबोध खानोलकर आणि दशावतारच्या टीमनं खास पोस्ट शेअर केली आहे. त्यांनी पोस्टमध्ये लिहिलंय, "दशावतारचा आज सहावा आठवडा सुरु झाला. आजही महाराष्ट्रातल्या अनेक चित्रपटगृहांमध्ये अनेक शोज हाऊसफुल आहेत."

"जगभरात अजूनही शोज लागत आहेत, लोक त्याला प्रतिसाद देत आहेत. खऱ्या अर्थाने लोकाश्रय लाभलेला हा चित्रपट ठरलाय. त्यातल्या गुणदोषांसकट सामान्य प्रेक्षकांनी त्याला डोक्यावर घेतलंय, हृदयात स्थान दिलंय."

त्यांनी पुढे लिहिलंय, "कोणा एकाचं हे यश नाहीये, आमच्या 250 जणांच्या टिमने प्रचंड मेहनत घेऊन ते कमवलंय! झी स्टुडियोच्या टिमने हा चित्रपट सर्वदूर पोहोचवून त्याला सामान्य प्रेक्षकांपुढे आणलंय."

"महाराष्ट्रभरातल्या चित्रपटगृह मालकांनी, मॅनेजर्सनी, तिकिट तपासनीसांनी आणि तिथल्या सफाई कामगारांनी सुद्धा प्रेक्षकांना हा चित्रपट बघायला मिळावा ह्यासाठी दिवस रात्र काम केलंय."

"प्रेक्षकांनी तर सकाळी 7:30 पासून ते रात्री 11:55 पर्यंतचे शोज फुल करुन दाखवून त्यांचं प्रेम दाखवलंय. साखळीतल्या पहिल्या माणसापासून ते शेवटच्या माणसापर्यंत साऱ्यांनी प्रामाणिकपणे केलेल्या मेहनतीचं हे फळ आहे."

"हे सगळं जुकून येणं दुर्लभ असतं. जे 'दशावतार' ला साध्य झालंय! आमच्याच नाही तर प्रामाणिकपणे घडणाऱ्या प्रत्येकच चित्रपटाला असं यश लाभो हीच इच्छा!"