'धुरंधर'च्या क्रेझला बसला ब्रेक? नव्या फिल्मचा जगभरात डंगा, पहिल्याच आठवड्यात पार केला 800 कोटींचा टप्पा

मुंबई: भारतीय बॉक्स ऑफिसवर सध्या एका देशी वादळाने सगळ्यांनाच गारद केलंय, ते नाव म्हणजे 'धुरंधर'! रणवीर सिंग आणि अक्षय खन्ना यांच्या या चित्रपटाने अशी काही दहशत निर्माण केली आहे की, 'इक्कीस' या चित्रपटाची रिलीज डेटही पुढे ढकलण्यात आली आहे.

इतकंच नाही, तर हॉलिवूडचा 'जादूगार' जेम्स कॅमेरून यालाही आपला किल्ला लढवण्यासाठी घाम गाळावा लागतोय. कॅमेरूनचा बहुप्रतीक्षित 'अवतार: फायर अँड ॲश' (Avatar 3) हा चित्रपट प्रदर्शित तर झाला, पण त्याला भारतीय प्रेक्षकांकडून अपेक्षेप्रमाणे उदंड प्रतिसाद मिळवण्यात अडचणी येत आहेत.

'धुरंधर'चा प्रभाव इतका जबरदस्त आहे की, 'अवतार ३' च्या कमाईत सुरुवातीला मोठी घट पाहायला मिळाली. मात्र, शनिवारी या सिनेमाने थोडी उभारी घेतली. शुक्रवारी २० कोटींची संथ सुरुवात केल्यानंतर, शनिवारी कमाईत २० टक्क्यांची वाढ झाली आणि या सिनेमाने २३ कोटींचा गल्ला जमवला.

दोन दिवसांत या चित्रपटाने भारतात ४३ कोटींची कमाई केली असून, पहिल्या विकेंडला हा आकडा ६५ ते ७० कोटींच्या घरात जाण्याची शक्यता आहे. रविवारी दुपारपर्यंतच्या आकडेवारीनुसार, चित्रपटाने आणखी ६.५३ कोटींची भर घातली असून एकूण कमाई ४७.८८ कोटींवर पोहोचली आहे. जरी हे आकडे ऐकायला मोठे वाटत असले, तरी 'अवतार'च्या ब्रँड व्हॅल्यूला पाहता हे अपेक्षेपेक्षा कमी आहेत.

चित्रपट व्यापार विश्लेषकांच्या मते, 'धुरंधर'च्या अभूतपूर्व क्रेझमुळे 'अवतार ३' ला किमान २५ टक्क्यांचा फटका बसला आहे. भारतीय प्रेक्षक सध्या देशी ॲक्शनला जास्त पसंती देत असल्याने जेम्स कॅमेरूनच्या पँडोरा जगाला थोडी प्रतीक्षा करावी लागत आहे.

'अवतार २' (द वे ऑफ वॉटर) ने पहिल्याच दिवशी भारतात ४० कोटींची कमाई केली होती, त्या तुलनेत तिसऱ्या भागाची सुरुवात निम्मीच झाली आहे.

भारतात जरी संघर्ष सुरू असला, तरी जागतिक स्तरावर जेम्स कॅमेरूनचा करिष्मा अजूनही कायम आहे. जगभरात या सिनेमाने १०० दशलक्ष डॉलर्सचा म्हणजेच सुमारे ८३० कोटी रुपयांचा टप्पा पार केला आहे. भारतात इंग्रजी भाषेत या चित्रपटाला ३१ टक्के ऑक्युपन्सी मिळाली असून, हिंदी पट्ट्यातही संथ पण स्थिर प्रतिसाद मिळत आहे.

आता येणाऱ्या ख्रिसमस आणि न्यू इयरच्या सुट्ट्यांमध्ये चित्र अधिक स्पष्ट होईल. जर या सुट्ट्यांमध्ये फॅमिली ऑडिअन्सने थिएटर्समध्ये गर्दी केली, तरच हा चित्रपट भारतातील 'टॉप ७ हॉलिवूड मूव्हीज'च्या यादीत स्थान मिळवू शकेल. 'धुरंधर'च्या लाटेसमोर 'अवतार'चा हे Fire and Ash तग धरून राहतो का, हे पाहणं आता रंजक ठरेल.