हिट सिरिअल, जबरदस्त फॅन फॉलोविंग; मग का ट्रोल होते मायरा वैकुळ? ट्रोलिंगला वैतागून सोशल मीडियाच सोडलं

मुंबई : ज्या निरागस डोळ्यांनी आणि गोड बोबड्या बोलांनी उभ्या महाराष्ट्राला वेड लावलं, ती छोटी मायरा वायकूळ म्हणजेच आपली लाडकी 'परी' सध्या डिजिटल जगातून गायब झाली आहे. सोशल मीडियावर रिल्सच्या माध्यमातून रोज हजेरी लावणारी मायरा अचानक दिसेनाशी झाल्यामुळे तिचे चाहते काळजीत पडले आहेत.

पण यामागे कोणतंही तांत्रिक कारण नसून, तिच्या पालकांनी घेतलेला एक अत्यंत महत्त्वाचा निर्णय आहे. सततचं ट्रोलिंग आणि "मुलीचं बालपण हरवतंय" या नेटकऱ्यांच्या आरोपांना कंटाळून मायराचे सोशल मीडिया अकाउंट्स बंद करण्यात आले आहेत.

'माझी तुझी रेशीमगाठ' या मालिकेतून प्रसिद्धीच्या शिखरावर पोहोचलेल्या मायराला जितकं प्रेम मिळालं, तितकीच टीकाही तिच्या वाट्याला आली. खरंतर, मायराचे रिल्स आणि व्हिडिओ हे तिचे आई-वडील श्वेता आणि गौरव वायकूळ हँडल करत असत. मात्र, गेल्या काही दिवसांपासून नेटकऱ्यांनी तिच्या पालकांना लक्ष केलं होतं.

"ही मुलगी वयापेक्षा जास्त शहाणी वाटते", "घरून स्क्रिप्ट पाठ करूनच निघते का?", "आमच्या वेळी असं वागलो असतो तर आईने हाणून काढलं असतं" अशा अत्यंत बोचऱ्या कमेंट्स तिच्या व्हिडिओवर येत होत्या. मायराची बोलण्याची ढब, तिचे हावभाव हे लहान मुलांसारखे नसून एखाद्या मोठ्या व्यक्तीसारखे वाटतात, अशी टीका सतत होत होती.

नकारात्मकतेचा हा ओघ इतका वाढला की मायराच्या पालकांनी तिचं इन्स्टाग्राम अकाउंट चक्क डिलिट करण्याचा निर्णय घेतला. धक्कादायक म्हणजे, तिचा छोटा भाऊ व्योम यालाही सोशल मीडियापासून दूर ठेवण्यात आलं आहे.

नुकताच व्योमचा बोरन्हाण सोहळा मोठ्या थाटात पार पडला. याचे फोटो आई श्वेताने शेअर केले खरे, पण त्यात कुठेही मायरा किंवा व्योमच्या अकाउंटला टॅग केलं नाही. आपल्या मुलांचं मानसिक आरोग्य आणि त्यांचं बालपण जपण्यासाठी पालकांनी हा कठोर निर्णय घेतल्याचं बोललं जात आहे.

सोशल मीडिया सोडला असला तरी मायराचा अभिनय प्रवास थांबलेला नाही. श्रेयस तळपदे आणि प्रार्थना बेहरे यांच्यासोबत ती लवकरच 'मर्दिनी' या चित्रपटात दिसणार आहे. पण रिल्सच्या दुनियेत जिथे तिला रोज जज केलं जायचं, तिथून मात्र तिने एक्झिट घेतली आहे. मुलांच्या बालपणावर कॅमेऱ्याचा प्रकाश किती असावा, हा नवा वाद आता या निमित्ताने सोशल मीडियावर सुरू झाला आहे.