'मी तुझ्याकडे अंघोळीला येतेय...', मराठमोळ्या अभिनेत्रीने सांगितलं पावसाळ्यात पुण्यात काय घडलं?

मुंबई: ग्लॅमरच्या दुनियेत वावरणाऱ्या सेलिब्रिटींबद्दल आपल्याला त्यांच्या कामाशिवाय त्यांच्या खासगी आयुष्यात काय चालतं, याबद्दल खूप उत्सुकता असते. आता मराठी आणि हिंदी सिनेसृष्टीत आपल्या दमदार अभिनयाने ओळख निर्माण केलेली अभिनेत्री गिरिजा ओक हिने तिच्या आयुष्यातील एका अत्यंत मजेशीर क्षणाची आठवण सांगितली आहे.

एका मुलाखतीत बोलताना गिरिजा ओकने तिच्या खास मैत्रीबद्दल आणि तिच्या आयुष्यात मैत्रिणींचे स्थान किती महत्त्वाचे आहे, याबद्दल भाष्य केले. ती म्हणाली, "जर तुम्ही एखाद्या व्यक्तीला फोनवर हे बोलू शकत असाल की, 'माझ्या घरी पाणी नाहीये, मी तुझ्याकडे अंघोळीला येत आहे', तर यापेक्षा चांगली आणि खरी मैत्री दुसरी कोणती असू शकते?"

हा किस्सा सांगताना गिरिजा ओकने तिची जुनी मैत्रीण सायली हिचे नाव घेतले. विशेष म्हणजे, सायली ही तिच्या नवऱ्याची मैत्रीण असली तरी, आता ती गिरिजाची खूप चांगली मैत्रीण बनली आहे.

ही घटना पुण्यात घडली होती. तो किस्सा सांगताना गिरिजा ओक म्हणाली, "एकदा पुण्यात मुसळधार पाऊस सुरू होता. पावसामुळे एका परिसरातील विजेचा खांब पडला होता, त्यामुळे आमच्या पूर्ण भागात लाईट नव्हती. जवळपास दोन ते तीन दिवस लाईट नव्हती आणि वीज गेल्यामुळे पाण्याचीही समस्या निर्माण झाली होती."

अशा परिस्थितीत, आपली कोणती मैत्रीण मदतीला धावून आली, हे गिरिजाने सांगितले. ती म्हणाली, "अशा वेळी मी सायलीला फोन करायची आणि सांगायची की, मी तुझ्या घरी अंघोळीला येत आहे! आणि सायलीच्या घरी मी अनेकदा अंघोळ केली आहे."

गिरिजाने नुसते अंघोळीचेच नाही, तर जेवणाचेही सिक्रेट उघड केले! सायलीशिवाय तिची आणखी एक मैत्रीण निशिगंधा हिच्या घरीही ती जायची. गिरिजा म्हणाली, "निशिगंधा देखील माझी चांगली मैत्रीण आहे. तिच्या घरी जाऊनही मी अंघोळ केली आहे आणि अंघोळ झाल्यानंतर त्यांच्या घरून मी जेवण करून मगच निघाली आहे!"

सेलिब्रिटी असो वा सामान्य व्यक्ती, गरजेच्या वेळी नि:संकोचपणे आपल्या मित्रांच्या घरी जाऊन मदत घेणे, हेच खऱ्या मैत्रीचे लक्षण आहे. गिरिजा ओकने सांगितलेला हा किस्सा खऱ्या मैत्रीवर प्रकाश टाकतो.