26 अनाथालय, 46 मोफत शाळा...; समाजासाठी सुपरस्टारने खर्च केलं संपूर्ण जीवन, लोकांनी असे फेडले उपकार

मुंबई: साऊथ चित्रपटसृष्टीतील 'पॉवर स्टार' पुनीत राजकुमार यांचे अकाली निधन होऊन अनेक वर्षे झाली असली, तरी ते आजही कोट्यवधी लोकांच्या हृदयात जिवंत आहेत. २९ ऑक्टोबर २०२१ रोजी वयाच्या अवघ्या ४६ व्या वर्षी हृदयविकाराच्या झटक्याने पुनीत राजकुमार यांचे निधन झाले होते.

या धक्कादायक घटनेनंतर सरकारला बेंगळूरुमध्ये जमावबंदी लागू करावी लागली होती. पुनीत राजकुमार हे त्यांच्या अभिनयापेक्षाही त्यांच्या दानशूरपणासाठी ओळखले जात होते.

पुनीत राजकुमार हे कन्नड चित्रपटसृष्टीतील सर्वाधिक मानधन घेणारे अभिनेते होते. त्यांच्या सलग १४ चित्रपटांनी थिएटरमध्ये १०० दिवस पूर्ण केले होते. पडद्यावर जरी ते सुपरस्टार असले तरी, खऱ्या आयुष्यात ते एका देवदूतापेक्षा कमी नव्हते.

त्यांच्या समाजसेवेची व्याप्ती खूप मोठी होती. ते २६ अनाथ आश्रम चालवत होते. गरीब मुलांसाठी त्यांनी ४६ मोफत शाळा सुरू केल्या होत्या. याशिवाय, ते १९ गौशाळा आणि १६ वृद्धाश्रम चालवण्याचे मोठे काम करत होते.

पुनीत राजकुमार यांनी समाजाला मदत करण्यासाठी नेहमीच पुढाकार घेतला. २०१९ मध्ये उत्तर कर्नाटकात आलेल्या भयंकर महापुराच्या वेळी मदतीचा पहिला हात त्यांनीच पुढे केला होता. तसेच, कोरोना महामारीच्या कठीण काळात त्यांनी कर्नाटक सरकारच्या मदत निधीत ५० लाख रुपये इतकी मोठी रक्कम दान केली होती.

सर्वात महत्त्वाचे म्हणजे, पुनीत यांनी मरणोत्तर नेत्रदान केले होते. त्यांच्या मृत्यूनंतर, त्यांच्या प्रेरणेने कर्नाटकात १ लाखाहून अधिक लोकांनी नेत्रदानाची शपथ घेतली!

पुनीत यांनी 'प्रेमदा कनिके' या चित्रपटातून आपल्या अभिनयाच्या कारकिर्दीची सुरुवात केली. अनेक चित्रपटांमध्ये त्यांनी बालकलाकार म्हणून काम केले.

केवळ १० वर्षांचे असताना, पुनीत राजकुमार यांनी मोठी कामगिरी केली होती. 'बेट्टदा हूवु' या चित्रपटातील बालकलाकाराच्या भूमिकेसाठी त्यांना राष्ट्रीय पुरस्काराने सन्मानित करण्यात आले होते.

या चित्रपटाने सर्वोत्कृष्ट कन्नड चित्रपटाचा राष्ट्रीय पुरस्कार आणि इतर अनेक पुरस्कारही जिंकले होते. पुनीत यांचे वडील डॉ. राजकुमार हे कन्नड चित्रपटसृष्टीतील पहिले अभिनेते होते, ज्यांना दादासाहेब फाळके पुरस्काराने गौरवण्यात आले होते.