Tejashri Pradhan : 'अचानक कोणीतरी येतं आणि म्हणतं...' पाच मालिकांची लीड अभिनेत्री, तेजश्री प्रधान का झाली भावुक!

'वीण दोघांतली ही तुटेना' या मालिकेतून सध्या प्रेक्षकांच्या भेटीला येणारी अभिनेत्री तेजश्री प्रधान. या मालिकेच्या निमित्तानं तेजश्रीचा एक वेगळा अंदाज प्रेक्षकांना पाहायला मिळतोय. तेजश्रीची प्रत्येक मालिका आधीच्या मालिकेपेक्षा वेगळी असते.

गेली 18 वर्ष तेजश्री छोट्या पडद्यावर प्रेक्षकांच्या भेटीला येतेय. तिने तिच्या प्रत्येक मालिकेतून प्रेक्षकांचं मनोरंजन केलं आहे. तेजश्रीने तिच्या कामातून प्रेक्षकांच्या मनात तिचं एक वेगळं स्थान निर्माण केलं.

'वीण दोघांतली ही तुटेना' ही तेजश्रीची सलग पाचवी मालिका आहे ज्यात ती लीड अभिनेत्री म्हणून काम करतेय. तिच्या या पाचही मालिका प्रेक्षकांनी डोक्यावर घेतल्या.

तेजश्री सोशल मीडियावर खूप सक्रीय असते. तिच्या मालिकेचे आणि वैयक्तिक आयुष्यातील अनेक अपडेट ती तिथे शेअर करत असते. दरम्यान तेजश्रीने एक भावनिक पोस्ट शेअर केली आहे.

अचानक कोणीतरी येतं आणि म्हणतं आमचं लक्ष आहे. तुमच्या वाटचालीवर, तेजश्रीला असं नेमकं कोण म्हणालं? तेजश्रीनं भावुक करणारी पोस्ट का लिहिली?

तेजश्री प्रधानने अशी भावनिक पोस्ट लिहिण्यामागचं कारणही तसंच आहे. गेली 18 वर्ष मालिकांचा प्रमुख चेहरा असलेल्या तेजश्री प्रधानला पहिल्यांदा राज्या शासनाचा मानाचा पुरस्कार मिळाला आहे. नुकताच तेजश्रीला हा पुरस्कार प्रदान करण्यात आला आहे.

अभिनेत्री तेजश्री प्रधानला राज्य सांस्कृतिक युवा पुरस्कार 2024 ने सन्मानित करण्यात आलं. पुरस्कार स्वीकारल्यानंतर तेजश्रीनं भावुक पोस्ट लिहिली आहे. तेजश्रीनं पोस्टमध्ये लिहिलंय, "आपल्या मार्गावर विश्वास ठेवून पुढे चालत राहणे, यशासकट अन् अपयशासकट..न थकता.. न डगमगता.. उरी विश्वास बाळगून.. की जाणारा प्रत्येक दिवस काहीतरी नवं देत राहतो !ते सर्व वेचत चालत राहणे."

"आणि मग,एक छानसा विसावा.. त्यात थोडा आढावा. करून ठेवलेल्या गोष्टींचा.. चुकलेल्याचा.. बरोबर गोष्टींचा.. मायबाप प्रेक्षकाच्या प्रेमाचा.. टिकेचा … आपुलकी दाखवणार्या सहकलाकारांचा.. हितचिंतकांचा आणि निंदकांचा…"

तेजश्री पुढे म्हणाली, "मग अचानक कोणीतरी येतं आणि म्हणतं, 'आमचं लक्ष आहे.. तुमच्या वाटचालीवर' आणि मग, मन पुन्हा नव्या जोमाने विश्वासाने पुढे चालू लागतं.. पुन्हा एकदा !! ह्या वेळी हे कोणीतरी फार महत्वाचं आहे माझ्या कलाक्षेत्रातल्या प्रवासासाठी… महाराष्ट्र शासन सांस्कृतिक कार्य संचालनालय राज्य सांस्कृतिक युवा पुरस्कार 2024."

तेजश्रीला तिच्या करिअरमध्ये पहिल्यांदाच शासनाचा पुरस्कार मिळाला आहे. चाहत्यांकडून तिचं अभिनंदन होतंय. तिने देखील, "महाराष्ट्र शासनाचे आणि माननीय मंत्री, सांस्कृतिक कार्य, माननीय अॅड. आशिष शेलार यांचे खुप खुप आभार या केलेल्या सन्मानासाठी", त्यांचे आभार मानलेत.