उन्हाळ्यात जास्त वेळ उपाशी राहिल्याने मायग्रेन होतो का? डॉक्टरांनी दिलं तुमच्या मनातल्या प्रश्नाचं उत्तर

उन्हाची तीव्रता दिवसेंदिवस वाढत आहे. अनेक ठिकाणी तापमानाचा पार 40 अंश किंवा त्यापेक्षाही अधिक वाढला आहे. या कडाक्याच्या उष्णतेतही अनेकांना कष्टाची कामे केल्याशिवाय भागत नाही.

उन्हाळ्याच्या कडाक्यात कष्टाची कामे करणाऱ्यांनी विशेष काळजी घ्यावी. कारण प्रखर उन्हामुळे मायग्रेनचा त्रास होऊ शकतो. मायग्रेनची कोणकोणती लक्षणे आहेत आणि मायग्रेन टाळण्यासाठी काय काळजी घ्यावी? याबद्दलच जालना जिल्हा शल्य चिकित्सक डॉक्टर राजेंद्र गाडेकर यांनी माहिती दिली आहे.

मायग्रेनची लक्षणे काय? नेहमी प्रखर सूर्यप्रकाशाच्या सान्निध्यात राहिल्यास मायग्रेनचा त्रास होऊ शकतो. तसेच सतत थंड पाण्याने पिल्याने देखील अर्धे डोकेदुखीचा त्रास होऊ शकतो. ही अर्धे डोकेदुखी ही अतिशय तीव्र स्वरूपाचीदेखील असू शकते. एखाद्या व्यक्तीस तीव्र स्वरूपाचा उग्र वासदेखील मायग्रेनसाठी कारणीभूत ठरू शकतो. त्यामुळे उग्र वासापासून दूर राहायला हवे.

उन्हाची तीव्रता जास्त असते तेव्हा या उन्हामुळे चाळे फटफट करतात. नरड्याला कोरड पडते, जास्त वेळ उपाशी राहिल्यामुळे मायग्रेनचा त्रास उदभवण्याची दाट शक्यता असते. अनेकदा जेवणाच्या वेळेला चहा किंवा नाश्ता करून अर्धपोटी उपाशी राहण्याची सवय झालेली असते. मात्र या सवयीमुळे त्यांना मायग्रेनसारख्या आजारास सामोरे जावे लागू शकते. त्यामुळे जास्त वेळ उपाशीपोटी राहणे टाळले पाहिजे.

मायग्रेन टाळण्यासाठी हे करा : जास्त वेळ उपाशी पोटी राहू नका, तीव्र उन्हात काम करणे टाळावे, महिलांनी घट्ट वेणी घालू नये, थंड पाण्याने आंघोळ टाळा. मायग्रेन आजाराची लक्षणे वेगवेगळी असतात. त्यामुळे त्रास झाल्यास तज्ज्ञांचा सल्ला घ्यावा, त्यांच्या सल्ल्यानुसार गोळ्या, औषधी घ्याव्यात.

उन्हाची तीव्रता वाढत आहे. उन्हात कष्टाची कामे करणाऱ्या व्यक्तींनी उन्हापासून पुरेशा प्रमाणात संरक्षण घेऊन कामे केली पाहिजेत. भरपूर प्रमाणात पाणी प्यावे, डोक्याला रुमाल बांधावा किंवा टोपी घालून कामे करावीत.

जास्त वेळ उन्हात राहिल्याने चाळे फटफट करणे, अर्धे डोकेदुखीचा त्रास होऊ शकतो. ज्यांना वासाची अॅलर्जी आहे अशा व्यक्तींनी उग्र वासाच्या संपर्कापासून दूर राहावे, तीव्र स्वरूपात डोकेदुखीचा त्रास होत असेल तर तज्ज्ञ डॉक्टरांचा सल्ला घ्यावा, असंही जिल्हा शल्य चिकित्सक डॉक्टर राजेंद्र गाडेकर यांनी सांगितले.