Bollywood Movies: हिरोच बनला खलनायक, बॉक्स ऑफिसवर उडवली खळबळ; तिन्हीही ठरले ब्लॉकबस्टर

s बॉलिवूडमध्ये असे काही कलाकार आहेत जे त्यांच्या प्रत्येक भूमिकेत प्राण ओततात मग ती हिरो असो किंवा व्हिलनची. असाच एक अभिनेता जो निगेटीव्ह रोलकरुन प्रसिद्ध झाला. या दमदार अभिनेत्याविषयी जाणून घेऊया.

1970 च्या दशकात रंगभूमीवरून आपली कारकीर्द सुरू करणारे हे अभिनेते आहेत नसीरुद्दीन शाह. साध्या भूमिकेतून ते नकारात्मक व्यक्तिरेखेपर्यंत, त्यांनी प्रत्येक पात्र इतक्या ताकदीने साकारले की प्रेक्षकांना ते पात्र खरंच जिवंत वाटले.

नसीरुद्दीन शाह यांनी पॅरलेल सिनेमापासून ते मसाला एंटरटेनरपर्यंत सर्व प्रकारचे प्रयोग केले. पण त्यांच्या खलनायकी भूमिकांनी वेगळाच ठसा उमटवला. 1994 साली प्रदर्शित झालेल्या मोहरा या ब्लॉकबस्टर चित्रपटात नसीरुद्दीन शाह यांनी 'जिंदाल' हा खलनायक साकारला. अक्षय कुमार, सुनील शेट्टी आणि रवीना टंडनसारख्या स्टार्सच्या गर्दीत त्यांनी स्वतःची ओळख निर्माण केली.

राजीव राय यांच्या दिग्दर्शनाखाली बनलेल्या या चित्रपटाने 4 कोटींच्या बजेटवर तब्बल 23 कोटींची कमाई केली होती. जिंदालची चाल, बोल, आणि डोळ्यांतील थंडपणा आजही प्रेक्षकांच्या लक्षात आहे.

1999 मध्ये आलेल्या सरफरोशने तर नसीरुद्दीन शाह यांना आणखी एका उंचीवर नेले. त्यांनी यात गुलफाम हसन या पाकिस्तानी गझल गायकाची भूमिका केली होती, जो नंतर दहशतवादी असल्याचे उघड होते. आमिर खानसोबतच्या त्यांच्या सीनने प्रेक्षकांना विचार करायला भाग पाडले.

8 कोटींच्या बजेटवर बनलेल्या या चित्रपटाने 33 कोटींची कमाई करत राष्ट्रीय पुरस्कारासह चार फिल्मफेअर जिंकले. आश्चर्य म्हणजे, चित्रपट रिलीज झाल्यानंतर काही महिन्यांतच कारगिल युद्ध सुरू झाले, त्यामुळे या चित्रपटाला विशेष महत्त्व प्राप्त झाले.

2006 मध्ये आलेल्या क्रिशमध्ये नसीरुद्दीन शाह पुन्हा एकदा व्हिलनच्या भूमिकेत झळकले. त्यांनी डॉ. सिद्धांत आर्य या वैज्ञानिकाची भूमिका साकारली, जो भविष्य सांगणारी मशीन तयार करतो. हृतिक रोशन आणि प्रियांका चोप्रा यांच्यासोबतच्या या चित्रपटाने 126 कोटींची कमाई केली आणि तीन आयफा पुरस्कार जिंकले.